Tele immap naqqatigut sulluliornialerpoq
Kabeli immap naqqatigoortoq 150 millionit koruuninik nalilik, Islandimiit Amerika avannarlermiillu, Qaqortumut Nuummullu siullermik attavilerneqarpoq. Tamatumalu kingorna kabeli Nuup eqqaaaniittoq sikunit ajoquseraangat Telep suliaritittariaqartarsimavaa.
Tele kabelip inissisimaffissaanik qaqqajunnami immap naqqaniittumi marlunnik maanna sulluliortitsinialerpoq.
Sulluliassat 1200 meteriusussat sanap ataanit sissamiit aallartinneqassapput, kabelillu 1200 meterimik takitigisumi sulluliakkoortinneqariarlutik immap naqqa 250 meteritut ititigilerpat aatsaat immap naqqanut sikumit anguneqarsinnaanngitsumut inissinneqassapput. Tele Greenlandimilu teknikkeqarfimmi pisortap Jørn Jespersenip kabelip suliarinera, Telep nunani allani atuisuinut taamaallaat malunniuteqarumaartoq oqaatigaa:
- Kabeli immap naqqatigoortup suliarineqarnera Kalaallit Nunaanni atuisunut malunnaateqarnavianngilaq. Marlunnimmi kabeliuteqarpugut. Ataaseq Islandimoortoq, ataaserlu Amerika avannerlermoortoq, immikkut tamarmik attaveqarnerup tungaatigut assigiimmik pisinnaassusillik.
Suliassarlu tamaat 20-t 50-illu millionit tungaannut akeqassangatinneqarpoq. Tamanna atuisunut akitigut malunnaataassanerluni?
- Tamanna takorloorsinnaanngilara. Telemi akinik appaaqammerpoq. Naak suliassaq akisugaluartoq, kabelip ukiorpassuarni atanissaa eqqarsaatigigaanni, taava isumaga malillugu Kalaallit Nunaanni atuisunut sunniuteqarnavianngilaq, Jørn Jespersen oqarpoq, taassumalu sooq aallaqaataaniilli, kabeli immap naqqatigoortoq, sulluliuunneqarsimannginnera ima nassuiarpaa:
- Greenland Connect pilersikkatsigu, immap naqqatigut kabeliliinissamut suliaq, immikkut ilisimasalinnut siunnersuisunullu ilusilersortipparput. Kabeli marloriaammik illersuuseriarlugu saviminermik poornissaa, immallu naqqanut assanneqarnissaa taamanikkut pitsaanerpaarpasissimavoq. Kingumullu qiviassagaanni taamaaliornikuunerput ilikkagaqaatigaarput. Nalusimanngikkutsigulu pitsaavallaanngitsuusoq, aallaqqaataaniilli massakkut iliulernitsitut iliorsimassagaluarpugut. Pisulli imaapput, immap naqqatigut kabeli pingasoria ajoquserpoq, taamaattumik iliuuseqartariaqarpugut, maannalu taamaaliorpugut. Jørn Jespersen oqarpoq.
Pilersaarutit malillugit suliariumannittussarsiorneq ukioq manna maajip 12-ianut killeqarpoq. Suliassaq junip ingerlanerani aallartinneqassasoq Tele Greenlandimit naatsorsuutigineqarpoq.
Suliarlu ukioq manna novemberimi naammassissasoq neriuutigineqarluni. Taamanikkussamulli naammassinngitsuussappat, suliaq upernarnissaanut kinguartinneqartariaqassaaq.