Teknikerit utaqqiisaasumik suleqqilissapput
Illuatungeriit isumaqatigiisitsiniartartumik pissarsiniassallutik isumaqatigiissutigisimagaat Attaveqaammi siulittaasup Jonathan N. K. Petersenip KNR-imut ullumi erseqqissarpaa.
Nunatta Eqqartuussisuunera Søren Søndergård Hansen isumatigiissitsiartuussasoq Nunatta Eqqartuussivianiit ualiartoq aamma nalunaarutigineqarpoq.
Teknikerit qaammat sinnerlugu suliumajunnaaqqareerlutik utaqqiisaasumik suliartoqqikkunik suliarsarpassuaqartut, Telemi sulisoqarnermi pisortap Karl-Henrik Simonsenip oqaatigaa.
- Attaveqaatikkut ajoqutit 216-it montørit suliassarivaat, aamma suliassat allat 420-t utaqqitinneqarput, Tele Greenlandip sulisoqarnermi pisortaa oqarpoq.
Atuisut 636-t suliumajunnaarnerup nalaani eqqugaapput, ilaalu ullut 40-t tikillugit utaqqisimallutik, soorlu oqarasuaatikkut attaveqalerniartut, internettikkut attaveqalerniartut imaluunniit najukkamik allassiamaffiannik allanngortitsiniartut.
Upalugaarsimanermut piareersimasut suliumajunnaarnerup nalaani sisamariarlutik suliartortariaqarsimasut Tele Greenlandimit ullumi oqaatigineqarpoq. Uummannami oqarasuaatit attaveqaataat qaammat kingulleq ajortippoq, Maniitsumi VHF-imut antenni ajortippoq KNR-illu tv-kkut attaveqaataa Sisimiuni ajortilluni. Ajoqutit tamarmik aaqqinneqareersut Tele Greenlandimit oqaatigineqarpoq.
Upalugaarsimanermut isumaqatigiissut Attaveqaatip atorunnaarsinniarlugu qaammat kingulleq siorasaarigaluarpoq. Isumaqatigiissut atorunnaarsinneqarsimagaluarpat politeeqarfinni, qatserisartoqarfinni napparsimaveqarfinnilu attaveqaatit ajoqutaat aaqqissorneqarsinnaasimassanngikkaluarput, kisiannili tamanna sioorasaarinerinnaasimavoq.