Taxaatileqatigiiffik aningaasanik akissarsititsiniarpoq

Taxartitsisoq marlunngornerup unnuani inuusuttunit sisamanit saassunneqarpoq aningaasiviallu tillinneqarluni.

Inuusuttut sisamat, angutit pingasut arnarlu ataaseq Nuup illoqarfiata qeqqani, angalatitseqatigiiffiup Air Greenland Travelip silataani marlunngornerup unnuaani ataatsip missaani taxanut ikipput.

Tassanngaanit Nuup illoqarfiani sumiiffinnut assigiinngitsunut aammalu Qinngutsinnut ingerlanneqareerlutik, Nuummi Blok K-p silataani, taxanik aquttup aningaasivia tillippaat.

Inuusuttut sisamat taakku politiinit ujarneqaraluarput mannalu tikillugu suli nassaarineqaratik.

Taxaatileqatigiiffiup suliniutaa Nuummi politeeqarfimmeersoq Niels Nyvangimit iluarisimaarneqarpoq.

Pinerluuteqartut paasiniarnissaannut akissarsisitsisarneq naleqqutinngikkaluartoq, Taxaatileqatigiiffiup iliuuseqarnera iluarisimaarparput, uagut paasiniarsinnaasavut tamaasa paasiniareeratsigik, Niels Nyvang oqarpoq.

Inuusuttunik sisamanik 18-it 22-llu akornanni ukioqartunik marlunngornerup unnuaani ataatsip missaani imerniartarfimmi Kajistiinaaqqamit anisunik takunnissiimasinnaasut, politiinut nalunaaqquneqarput.

Angutit pingasut ilaat ataaseq 180 imaluunniit 185 centemeterit missaannik angissuseqarpoq, sinneri arnartaat ilanngullugu 160 imaluunniit 165 centimeterit missaannik angissuseqarlutik.

Inuusuttut taxartitsisumik saassussillutillu aningaasivianik tillittut arlaannaalluunnit politiinut saaffiginneqquneqartut, Nuummi politeeqarfimmeersoq Niels Nyvang oqarpoq.