Tatsit arlallit Alcoamut neriorsuutaareersimapput
Isukasiani aatsitsiviliortoqassappat erngup nukinganik innaallagissiorfiliortoqarnavianngilaq. London Mining Greenland aamma Naalakkersuisut taama ilisimatitsipput.
Tamanna saqqummerpoq Isukasiani aatsitassarsiorfiliorniarneq pillugu tusarniaanermi kulturikkut illorsuarmi Katuami pisumi.
London Mining siusinnersuukkut tusarniaanermi nalunaareerpoq erngup nukinganik innaallagissiorfiliornissamik pilersaaruteqarani.
- Misissueqqaarnerit eqqaaginnaanni ukiunik arlalinnik sivisussuseqarsinnapput suliassallu aallartinnissaa kinguarsarsinnaallugu. Qularaarput aningaasaliisut suliap kinguaattornissaanut akuersaarumaarnersut. Peqataaffigiumanavianngilaat aningaasaliissutimik utertinniarnerat ukiunik arlalinnik kinguaattuussappat, London Mining Greenlandimi pisortaq Dr. Xiaogang Hu oqarpoq.
Namminersorlutik Oqartussat aamma pilersaaruteqanngillat Isukasiani aatsitassarsiorfiliortoqassappat erngup nukinganik innaallagissiorfiliornissamut.
- Tatsit periarfissaasinnaasut Alcoap aatsitsivissaa akuerineqassagaluarpat tassunga atugassatut neriorsuutaareernikuupput, Aatsitassanut naalakkersuisoq Ove Karl Berthelsen ataasinngornermi unnukkut Katuami tusarniaalluni ataatsimiinnermi oqarpoq.
- Kisianni imaanngilaq tassa Alcoap aatsitsiviliornissaa piviusunngussasoq. Alcoap suliutaa piviusunngussanngippat Isukasiani aatsitassarsiorfiup erngup nukinganeersumik innaallagissamik pilersornissaanut periarfissaq takkuttussaavoq, Ove Karl Berthelsen oqarpoq.
London Mining siusinnerusukkut nalunaareerpoq erngup nukinganik innaallagissiorfimmiit innaallagissamik pisiumakutsoorlutik.
London Mining Greenlandip naatsorsuutigaa aatsitassarsiorfissap sananerani 30 milliarder koruunit atorneqassasut. Suliffeqarfissuullu taassuma naatsorsuinerisa takutippaat aningaaliissutit ukiut sisamaat affaq atorlugu utertinneqarsinnaajumaartut.
