ASSIT Tasiilaq Tiilerilaarlu Frankrigimi cirkusimeersunit tikeraartoqartut
Frankrigimeersut Lucille Brunet, Luc Denoyer aamma Alexia de Khovrine immikkut issittoq pillugu soqutigisaqartuupput, taamatullu Kalaallit Nunaanni ukioqatigiiaat assigiinngitsut imminnut ataqatigiinnissaannik kissaateqarlutik.
Tamanna ersersinniarlugu ilaatigut qajartortitsillutik illukut siulit tammaarsimaarfigisartagaat ornippaat, tamaani inuusuttut utoqqaallu siulit piniartutut inooriaasiannik takusaqarlutillu misiliinissaannut periarfissillugit. Kommuneqarfik Sermersooq nittartakkamini taama allaaserisaqarpoq.
Lucille Brunet cirkusimi takutitsisartuuvoq taassumallu inuusuttut eqaalluinnarluni pissusilersuutinik quiasaarinermillu ilinniartippai.
- Iluatsitserujussuarpugut aamma Tasiilami Tiilerilaamilu meeqqat inuusuttullu peqatigalugit eqaalluinnarluni pissusilersuutinik, akortaarinermik, illarnermik, nuannaarnermik allanillu quianartussarsiornermik avitseqatigiinnissamut periarfissinneqarpugut, Lucille Brunet taama oqarpoq.
Assit qulaani tkauneqarsinnaapput.