Tasiilaq: Imigassamik inerteqquteqarnerup atorunnaarnerata kingorna eqqissisimasoqartoq
Tasiilami nunaqarfiinilu innuttaasut immiaaqqanik imigassanillu imerniartarfinni tallimanngormat nalunaaqutaq unnuap qeqqartoq pisisinnaaleqqipput.
Imigassamimmi inerteqquteqarallarneq septembarip aallartinnerani sakkortuunik arlalinnik pisoqarnerata kingornatigut sapaatini akunnerni marlunni atuutilersinneqartoq tassani atorunnaarpoq.
Inerteqquteqarnerulli atorunnaarsinneqarnera politiinut ulapisitsinngilaq.
AAMMA ATUARUK Tasiilami innuttaasunik ataatsimiititsineq: Imigassarsisinnaaneq 21-nik ukiulinnut killilerneqarusuppoq
Tasiilami politikommissæri, Jan Geisler KNR-imut ataasinngornermi oqarpoq.
- Politiit Tasiilami imigassamik inerteqquteqartoqarnerata nalaani ammaffiup avataani aggersarneqanngillat. Imigassamik inerteqquteqarnerup atorunnaarsinneqarnerata kingorna suliassaqaqqilerpugut, kisianni ilungersunaratillu amerlasoorujussuunngillat, politikommissæri oqarpoq, nangillunilu:
- Politiit suliarisartagaat eqqarsaatigalugit eqqissisimangaatsiartoqarpoq.
Illoqarfik pisoqarfiusoq
Politiit Tasiilami nunaqarfinnilu innuttaasunit 20-nit tallimanngornermi unnuap qeqqanit ataasinngornermut ullaakkumut saaffigineqarput.
Sulianit qulingiluat Tasiilami pisuupput nunaqarfinniillu pingasuullutik taakkulu tamarmik imigassartornermut atuumassuteqarlutik.
Sulialli ilungersunartorujussuartaqanngitsut, Jan Geisler nassuiaavoq.
- Sapaatip akunnerata naanerani imerniartarfinnut imigassamullu tunngatillugu pisoqarfiuvoq, inuillu qaammassimaarrappasipput nuannisartoqarpasillunilu.
Ataasiakkaanik unitsitsisoqartoq
Tasiilami peqqinnissaqarfimmi peqqissaasuuneq, John Christensen assinganik nalunaaruteqarpoq.
- Tupaallannartumik eqqissisimasoqarpoq. Imigassartorsimanermut attuumassuteqartunik ataasiakkaanik unitsitsivugut, allanulli naleqqiullugu eqqissisimasoqarneruvoq. Sakkortuumik pisoqarneranik naammattuuinngilagut, peqqissaasuuneq oqarpoq.
Tasiilami nunaqarfiinilu tallimani imigassamik nioqquteqarneq oqaatigineqareersutut sapaatini akunnerni marlunni matoqqatinneqarnikuuvoq.
AAMMA ATUARUK Tasiilami imigassamik inerteqquteqaqqusisoq: Allamik imminut toquttoqarnissaa ernumassutigigatsigu
Tamanna akissarsiffiup akileraarutinillu utertoorfiup nalaani ajortorsiuterpassuarnik misigisaqartoqarneranik pissuteqarpoq.
Imigassartortoqarneranut attuumassuteqartumik napparsimmavimmut unittut saaffiginnittullu amerlangaatsiarnerat pissutigalugu peqqinnissaqarfik sulianut malinnaasinnaajunnaarpoq.
Matusisoqarnerata kingorna illoqarfimmi inuiaqatigiinni ajornartorsiutaasut qanoq aaqqiiviginiarneqarnissaanut innuttaasunut ataatsimiitsitsisoqarpoq.
- Inuit eqqarsarluarnissamut illoqarfimmullu aaqqiissutissanik eqqarsarnissamut sapaatini akunnerni marlunni periarfissinneqartut isumaqarpunga. Pissutsinik oqallisigininnissamut allannguinissamullu kajumittoqartoq innuttaasunut ataatsimiititsinermut takkuttut 250-it takutippaat, John Christensen oqarpoq.