Tasiilamut takornariat amerlanerusinnaanerat Air Greenlandimit killilersorneqarpoq
Takornariarititsivik Arctic Wonderland Tours Tasiilami angerlarsimaffeqartoq tusagassiuutinut nalunaaruteqarluni allagaqarluni nalunaarpoq, Tasiilami Kulusummilu Hotelini pingasuusuni takornariat 3.000-it missaannik amerlassuseqartut unnuisimasut. Takornariat amerlanerusinnaagaluarput, Tasiilap Kulusuullu akornanni timmisortitseqatigiiffik Air Greenland qulimiguulimmik timmisartuussisarnera tamakkiisumik ingerlanneqarsimagaluarpat, Tasiilami takornariartitsivimmi Arctic Wonderland Tours-imi pisortaq Miké Nicolaisen oqarpoq.
Air Greenlandip qulimiguujutaanik Tasiilap Kulusuullu akornanni timmisartuussisarnerit ikippallaarnerat pissutaallutik, takornariat Tasiilamukarniarlutik inniminniisimasut taamaatitsisartut amerlapput , Miké Nicolaisen timmisartortitseqatigiiffik Air Greenland isornartorsiorlugu taamatut allagaqarpoq. Kulusup Tasiilallu akornanni Air Greenlandip qulimiguuanik timmisartuussisarnerit Namminersorlutik Oqartussanik sullissinissamik isumaqtigiissuteqarnikkut ingerlanneqarpoq. Miké Nicolaiseni isumaa malillugu timmisartortunik ingerlaarfiit amigaartooruteqarfiusut pisortanit tapiiffigineqarlutik ingerlanneqarput, taamaattumillu Air Greenland Tasiilap Kulusuullu akornanni timmisartuussisarnini annaasaqaataasarnera pinaveersaarniarlugu , timmisartuussisarnerit ikinnerusut ingerlanneqartarnerlugit tusagassiuutinut allagaqarpoq.
Tamannali timmisartortitseqatigiiffimmi Air Greenlandimi tuniniaanermut pisortap Klaus Johansenip ilumuunnginnerarpaa. Kiffartuussinissamut isumaqatigiissummi piumasarineqartut malillugit timmisartuussiniartarpugut, pisisartuttalu piumasarisaat aamma malinniartarlugit. Angallaffiunerpaaffiusuni angalanissanut pilersaarutini takuneqarsinnaavoq, pisinnaasarput tamaat atorlugu ullormut timmisartuussisartugut, ilanngullugulu Klaus Johansenip erseqqissarpaa timmisartuni aquttut timmisartornerminni unikkarlartarnissaminnut malittarisassaat malinneqartartussaanera erseqqissaatigalugu.
Mike Nicolaisen tusagassiuutinut allagaqarluni eqqarsarnartoqartippaa, Namminersorlutik Oqartussat kitaani takornarianik inuussutissarsiuteqartunik tapersersuiitigaluni tunumi takornariat angallanneqarnissaanik sullissinissamik isumaqatigiissuteqarnikkut killilersorneqartoq.
Tamanna pillugu Klaus Johansen oqarpoq, Tasiilap Kulusuullu akornanni timmisartuussisarnerit piffissami sivikitsuinnarmi amerlineqassappata, sulisut amerlanerit atortussallu annertunerusut pisariaqartinneqassassut, maannakkullu Air Greenland atortut sulisullu amerlanerusut pissarsiarinissaanut periarfissaqanngilaq. Piffissani angallaffiunerpaasuni, Air Greenlandimi sulisut timmmisartullu tamarmik atorneqartarput, Klaus Johansen oqarpoq. Timmisartortitseqatigiiffiup Air Icelandip Kulusummut timmisartuussisarnera Kulusuuup Tasiilallu akornanni timmisartuussisarneranut naleqqusarneqarsimavoq, Klaus Johansenillu erseqqisarpaa aningaasarsiornikkut Air Iceland suleqatigineqanngimmat.
