Avatangiisit

Tasiilami sila 2016-imi arlalinnik rekordiliiffiusoq

Tasiilami ukioq manna juunimit oktobarimut ulluni 139-ni atasuinnarmik issittarnani kiappoq. Tamanna pissutaalluni silap kiattarnerani arlalinnik rekordiliisoqarpoq. Danmarkimi silasiortut DMI-meersut ullumi taama allaaserisaqarput.
Assi © : Kommuneqarfik Sermersooq
Allattoq Karsten Sommer
novembarip 02-at 2016 11:16
Nutserisoq Mads Lynge

DMI-p silap kiassusianik ukiut 120-t sinnerlugit uuttuisarnerani Tasiilami oktobarimi kiattuaannartarsimanngilaq, ukioq mannalu taamaangajassimavoq. Ataatsimullu isigalugu aatsaat taama kiatsigisimalluni:

- Tasiilami ukioq manna kingusissukkut issittalerpoq, John Cappelen, Kalaallit Nunaanni silap pissusianik immikkut ilisimasalik DMI-meersoq, oqarpoq, nangillunilu:

- Oktobarip ulluisa 26-anni siullermik issippoq. Kingorna qiianarnerulaaginnalerpoq, oktobarimilu issinnerpaagami minus 2,3 gradinik issippoq, John Cappelen oqarpoq.

Tasiilamilu oktobari taamaasilluni 1895-imiilli agguaqatigiissillugu kiannerpaasimavoq.

- Tasiilami uuttortaaviup uuttortagaa naapertorlugu oktobarimi agguaqatigiissillugu 4,2 gradinik kiappoq. Tamanna rekordiuvoq, pisarnermiillu kiannerulluni. 1981-imit 2010-mut uuttortaanerit takutippaat oktobari piffissami tassani agguaqatigiissillugu minus 0,4 gradinik issittoq, Cappalen oqarpoq.

Ukioq mannalu 2016 Tasiilami rekordiliiffiusarfiuvoq.

Tassami qaammatini siullerni qulini ataatsimut isigalugu aatsaat taama kiatsigaaq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk