Tasiilami qamuteralaat 47-nik ukiulimmik aquttullit tammaaneqartut

Mikael Mikaelsen 47-nik ukioqartuusoq arfininngormat Tasiilamiit Tiniteqilaaliarluni aallaraluarpoq, aqqutaatali affaa angullugulu aqqulluppallaaqimmat utimut aallaannarpoq. Utimulli ingerlatilluni qamuteralai ingerlanerliulerput.

Tasiilamut ingerlaartilluni qamuteralannik angalaartut allat marluk naapippai, taakkulu Mikael Mikaelsen ikiorlugu. Mikael Mikaelsenilu ajunnginnerarmat ikiuisut ingerlaqqiinnarsimapput.

Tamatuma kingorna takuneqaqqikkaluanngilaq. Sapaatiummat unnukkut politiit qamuteralaat atorlugit Mikael Mikaelsenimik ujaasinertik aallartippaat, nittaappallaaqimmalli ujaasinertik unitsiinnarsimallugu.

Arktisk Kommandop timmisartuni Challengeri ujaarsiartortillugu Tasiilamukartikkaluarpaat, nittaappallaarneratali ujaasinissaq ajornakusoortissimagaa, Tasiilami Politiit aqutsisuata Mathæus Larsenip oqaatigaa.

- Maanna silagissinissaa utaqqiinnarparput. Akunnerummi naanerani 1,5 meterinik portutigisumik apersuaarpugut, ujaasinissarlu ajornakusoorsitillugu. Silali atorsaruumeriarpat ujaaseqqilernissatsinnut piareersimavugut. Mathæus Larsen oqarpoq.

Ullumi ataasinngornermi Tasiilap nalaani suli anorersuarlunilu persernissaa ilimasaarutigineqarpoq. Marlunngorpalli sila atorsaruuminissaa ilimasaarutigineqarpoq anorilu sekundimut meterit tallimat angullugit sakkortussuseqaannassalluni.

Mikael Mikaelsen kingullermik takuneqarfiani Tasiilarmiunik ”kaffebar-imik” ilisimaneqartumi pingasunik illuaraqarpoq.

- Ujaarineqartup illuaqqanut apuulluni oqquisinnaasimanera neriuutigiinnarparput, Mathæus Larsen oqarpoq.

Angut ujaarineqartoq taartunik atisaqarpoq, qamuteralaalu Yamahaallutik. Mikael Mikaelsen pillugu paasissutissaqaruit Tasiilami Politiinut oqarasuaat 701224-imut attaveqarsinnaavutit.