Tasiilami nuna sajoqattaarpoq
Nunap sajuttaqattaarnera ilaatigut sakkortusarmat Marie Biancop annilaanganarnerarpaa.
- Ulluni kingullerni sisamani nuna arlaleriarluni sajuppoq, uagut tunumiutut taasarparput "iddiimileq" nuna sajoqattaartoq. Taava tallimanngorneq arfininngorneq sapaat ataasinngorneq ullormut arlaleriarluni sakkortuumik malugisarparput sajoqattaarnera, Marie Bianco oqaluttuarpoq.
Danmarkimi Kalaallit Nunaannilu ujarassiuutut misissuiffimmi Geus-mi nunap sajuttarnerinut ilisimatooq Peter Voss oqarpoq marsip 28-ani sajunneq Haitimi nunap sajunneranut sanilliutissagaanni, kisitsisinngorlugu Haitimi 7,9 richterskalaammat Tunumi sajunneq 3,0 richterskalatut sakkortutigisoq. Tamannalu Marie Biancop ima oqaluttuaraa.
- Soorlu qaarpallattoqartoq sakkortuumik, illorput sajuppillalluni. Annilaangatuujulluni annilaanganartaqaaq, Marie Bianco oqarpoq.
Haitimili sajunnertut nunap sajunnissaa annilaangassutigissaanngitsoq, Peter Voss oqarpoq.
-Naamik! Kalaalliit Nunaanni Danmarkimiluunniit quppanik nunap sajunneranut aallartiffiusartunik Haitip eqqaanisut angitigisunik peqanngilagut taamaammat naatsorsuutiginngilluinnarparput assingusumik sajuttoqarnissaa.
Ullut tamaasa nunap sajulaartuarnera malugisimasanngiinnaripput, Peter Voss oqarpoq.
