Tasiilami KNI-p quersuani tillinniartoqarpoq
Inuusuttut pingasut 18-iniit 20-nut ukiullit Tasiilami KNI-p quersuani sapaatip akunnerata naanerani tillinniarnerminni immiaaqqat karsit aqqaneq-marluk tillippaat. Tasiilami politiit ilaat Leif Nielsen Radioaviisimut taama oqaluttuarpoq.
aggustip 04-at 2009 05:24
Tillinniarneq arfininngornerup sapaatillu unnuaani pivoq. Tillinniat tillitatik umiatsiamut aamma tillitaminnut usilersuuteriarlugit Kulusummukarput. Kulusummi katersortarfimmut iserniarsarileruttortut kommunefogedimit tigusarineqarput.
Tillinniaqataasut marluk maanna iperagaareerput, taamaattorli tillitaminnik aserortikkaminnillu taarsiisussanngortinneqassallutik.
Tasiilami quersuarmut tillinniartoqannginnerani inuusuttut tillinniaqataasut ilaata angut 70-inik ukiulik aamma saassussimavaa. Saassussineq taanna tillinniat Kulusummeereersullu politiit aatsaat paasivaat.
Angut inuusuttoq saassussisoq maanna tigummineqarpoq inatsillu tunngaviusoq naapertorlugu ullumi killisiorneqassalluni.
