Tasiilami Kalaallisuuliornermik Ilinniarfiliortoqassanngilaq
Tasiilami immikkoortortaqarfiliortoqassanngitsoq Nick Nielsen oqaatigaa. Nielsen nassuiaavoq Tasiilami suliffissaaleqinerujussuup iliuuseqarfiginissaanut suliniutissanik ujarlerlutik Naalakkersuisut siuliini ilaasortat pingasut 2012-ip naalernerani Tasiilamut tikeraarsimasut.
Tamatumunngalu aaqqiissutissat ilaattut Palle Christiansenip, Ove Karl Berthelsenip Mimi Karlsenillu ilinniarfiup pineqartup Tasiilami immikkoortortaqarfiliortoqarsinnaanera tikkuarsimavaat, Tasiilamulli tikeraarnerisa kingunitsianngua qinersisoqarmat iliuuseqarfigeqqinneqarsimanngilaq.
Nick Nielsen oqaluttuarpoq naalakkersuisunngornermi kingorna Tasiilami suliffissaaleqinerup akiorniarnissaanut tunngatillugu allaanerusumik pingaarnersiulersimalluni, illoqarfimmi innuttaasut inuusuttut suliffissaaleqinerisa akiorniarneqarnissaa pingaarnerutillugu iliuuseqarfiginiarneratigut. Taamaammat Tasiilami Kalaallisuuliornermik Ilinniarfik immikkoortortaqarfeqalissanngilaq.