Tasiilami atuarfimmi isumaginninnermi siunnersorti aapperneqalersoq
![](/sites/default/files/styles/image_934x467/public/article_images/tasiilaq_skole_google_streetview.png?itok=Q4X-bDXH)
Kommuni atuarfinni arfinilinni maannakkut siunnersorteqartitsivoq – Nuummi atuarfiit sisamat, Paamiuni atuarfik aamma Tasiilami atuarfik. 2017-imut missingersuutinut ilanngullugu Tasiilami isumaginninnermi siunnersortitut atorfiup pioreersup saniatigut allanik aningaasaliissuteqartoqarpoq. Kommuni nittartakkamini taama allaaserisaqarpoq.
Kommuneqarfik Sermersooq kisiartaalluni meeqqat atuarfiini isumaginninnermut siunnersorteqartitsivoq. Atuarfinni isumaginninnermut siunnersortit meeqqanik siunnersuillutillu ilitsersuisarput, ilinniartitsisullu meeqqanik sullissineranni ikorfartuisarlutik. Suliassaqarfik siamasissorujussuuvoq – atugarissaartitsinermiit qinngasaarisarnermik pitsaaliuinermut atuartunillu sakkortuumik nalaataqarsimasunut ilitsersuinermut, soorlu atornerlugaanermut isumassorneqannginnermullu tunngasut.
Isumaginninnermi siunnersortit suliatigut artukkerneqartut
- Atuarfinni isumaginninnermi siunnersortit meeqqanut ajornartorsiortunut annertuumik allannguipput, atuarfinnilu ataasiakkaani meeqqat ulluinnarni pitsaanerusumik atugassaqarnissaannut sunniuteqaqataallutik. Isumaginninnermi siunnersortit atuarfinni artukkerneqareeqisuni aamma suliatigut annertuumik artukkerneqarput. Taamaattumik nuannerpoq, Tasiilami isumaginninnermut siunnersortitut atorfiup pioreersup saniatigut allamik atorfinitsitsinissamut missingersuutitigut aningaasaliisoqarmat, Meeqqanut, Ilaqutariinnut Atuarfeqarnermullu Ataatsimiititami siulittaasoq Poul Hansen (D) kommunip nittartagaanut taama oqarpoq.
Isumaginninnermi siunnersortip suliatigut annertuumik nammakkerneqarnerata kinguneraa, suliat pinartut pingaarnertut isumagisariaqartarmagit – assersuutigalugu meeqqat kannguttaatsuliorfigineqarsimasut imaluunniit annertuumik sumiginnakkat. Tamanna assersuutigalugu pitsaaliuinermik suliaqarnissamut piffissakinnerunermik kinguneqarpoq.
Tasiilami isumaginninnermut siunnersortip pioreersup saniatigut allamik siunnersortitaarnissamut aappaagumut missingersuutini ukiunilu missiliuuteqarfiusuni aningaasaliissuteqartoqarpoq, kommuni taama ilisimatitsivoq.