Tasiilami inuusuttut kulturikkut illorsuartaalersut
![](/sites/default/files/styles/image_934x467/public/article_images/kulturhus_tasiilaq_b-407.jpg?itok=YB9IL6KG)
Illoqarfimmi illu qasertoq, B-407, kulturikkut illorsuassatut atorneqassaaq.
Illorsuassaq suliniummut ”Siunissaq uagut Pigaarput”-mut atatillugu pilersinneqarpoq. Suliniut ukiuni pingasuni ingerlanneqassaaq, inuusuttullu akornanni kulturikkut eqqumiitsuliornikkullu sammisaqarnikkut ataqatigiinnermik, ilorrisimaarnermik imminullu naleqartinnerulernermik misiginerup nukittorsarnissaanik siunertaqarluni.
Suliniut 2015-imi apriilip qaammataani aallartinneqarpoq aningaasaateqarfinnillu arlalinnit tapersorneqarluni.
Tasiilami taama ittumik ornigaqarnissap inuusuttunit amigaatigineqarnera borgmester Asii Chemnitz Narupip Tasiilamut tikeraarnermini kingullermi uppernarsivaa.
- Tasiilami inuusuttut kulturikkut illorsuaat inuusuttut akornanni ilorrisimaarnerup imminullu upperinerup aallarnerfigissavaa, Asii Chemnitz Narup tusagassiorfinnut nalunaarummi taama oqarpoq.
Inuusuttut kulturikkut illorsuassaannut illu atorneqartussaq pigineqalermat, suliap aaqqissuuneqarnera aningaasalersorneqarneralu aallartinneqarpoq.