Tasiilami innuttaasut juullertinnagu umiarsuaqaqqinnissaa piumasarigaat

Umiarsuaq assartuut ukioq manna tikittussaq kingulleq, Tasiilamut sapaatip-akunnera kingulleq tikimmat, illoqarfimmi innuttaasut isumakululerput.

Inuussutissanik ukiuunerani nioqqutissaaleqisoqalernissaa arlallit ernummatigaat.

Taamaattumik innuttaasut 373-it  umiarsuarmik assartuummik ataatsimik juullertinnagu tikinneqarnissaq Royal Arctic Linemut piumasaralugu atsioqataaffigivaat.

Nioqqutissaaleqisoqalernissaa ernummatigigaat

Nuka Pivat atsiortitseqattaarnissamik aallarniisut ilaagaat taannalu oqaluttuarpoq inuppassuit qaammatinut tulliuttussanut isumakuluuteqalereersut.

- Umiarsuaq kingulleq ukioq manna siusissukkut tikippoq, pissutsillu ajorsiartuinnarput. Umiarsuaq avalappat qaammatit arfineq-marluk qaangiuppata aatsaat umiarsuaqaqqissaaq, taanna oqarpoq.

Royal Arctic Linemi ingerlatsinermut pisortaq Aputsiaq Lyngep oqarnera naapertorlugu, umiarsuarnik assartuutinik 14-inik Tasiilamut ukioq manna tikittoqartoq. Aappaagumut tikittussatut naatsorsuutaasut amerlaqatigaat.

Umiarsuulli tikittussap tullia maajimi 2026-mi aatsaat tikissasoq naatsorsuutigineqarmat,  pisiniarfinni nioqqutissat upernaqqajanngitsorli nungunnissaat, inuttaasunit arlalinnit ernummatigineqarpoq.

- Manniit, yoghurt, qallersuutit, immuk neqillu. Nioqqutissarpassuarnik nunguutsikkajuppugut. Pisiniarfinni ilisiviit imaarutingajavittarput, Nuka Pivat oqarpoq.

Royal Arctic Line ajornartorsiummut eqqumaffiginnilersinniarlugu innuttaasut atsiortitseqattaarput, taakkulu Royal Arctic Linemut nassiunneqareerput.

- Siullermik Royal Arctic Linemut allagaqarpugut taava atsiortitseqattaalerpugut. Atsiornerit katillugit 373-it, Nuka Pivat oqarpoq. 

Umiarsuit amigaataasut imarlu sikoqaqisoq

Tasiilami innuttaasut illoqarfiup pilersorneqarnera naammaginngilluinnarpaat, isumaqarpullu nunap sinneranut sanilliullugu immikkoortinneqarlutik.

- Pitsaanerusumik kiffartuunneqarnissarput tusarneqarnissarpullu kissaatigaarput. Nunatta sinnerata pilersorneqartarneratulli pilersorneqarusuppugut. Neriuppugut kissaativut pimoorunneqarumaartut, naammagittaannarsinnaanngilagummi, Nuka Pivat oqarpoq.

Pilersuisup pisiniarfiinut nioqqutissat KNI A/S-imit nassiunneqartarput Royal Arctic Linemillu assartorneqartarlutik. Tasiilamut immikkut assartuisoqarsinnaassagaluaruni tamanna nuannaarutigilluinnarneqassagaluarpoq. Tamannali KNI-mut ukiornissaanut nalinginnaasumik pilersortareersimasumut allannguinngilaq, Nanna Lynge Isaksen, KNI A/S-imi nioqqutissaqarnermut pisortaq oqarpoq.

Aputsiaq Lyngeli Tasiilami innuttaasunut allakkatigut akissuteqarnermini, innuttaasut atsiortitseqattaartut ajoraluartumik aappaagu maajip tungaanut naammagittarsinnaasariaqartut erseqqissaavoq.

- Ukioq manna angalanerup sivitsorneqarnissaa atorsinnaasumik umiarsuassaqartinngilarput. Umiarsuit piffissami angalaffiusumi piffissap ilaanut aalajangersimasunut attartugaasarput suliassanullu allanut pilersaarusiorneqareersunut ingerlaqqittarlutik. Taamaattumik decembarimi umiarsualeeqqinnissatsinnut ajoraluartumik periarfissaqanngilagut.

Ukioq manna angalaneq kingulleq novembarimi pisussaammat tamanna isumannaallisaanermut tunngassuteqartoq, nangilluni oqarpoq. Tamatuma kingorna immap sikulernera pissutigalugu sikusiortoqarsinnaanera silarlussiortoqarsinnaaneralu ilimanaateqarnerujartuinnassaaq.

Assartuummik umiarsuaqaqqinnissaa kaammattuutaasoq

Nuka Pivatip umiarsuaq assartuut alla tikissinnaassasoq suli neriuutigaa.

- Umiarsuarmik decembarip aallartinnerani suli tikittoqarsinnaavoq. Taamaattumik umiarsuaq assartuut alla maanna amigaatigisatsinnik qanittukkullu amigaatigilersinnaasatsinnik usilik decembarip aallartinnerani tikissasoq kissaatigaarput.

Tasiilamilu innuttaasut atsioqattaartitsinermut peqataanikut pissutsinik naammaginninngitsuni kisimiinngillat. 

Inuit Ataqatigiit sinnerlugit Inatsisartunut ilaasortap Iddimanngiiu Jensen Biancop umiarsuarmik assartuummik Tasiilamut ukioq naatinnagu aallartitsisoqaqqinnissaa kaammattuutigalugu aamma Attaveqaasersuutinut Naalakkersuisumut tamanut ammasumik saaffiginnissuteqarpoq.