Tasersuarmi angallattoqannginnissaa kajumissaarutigineqarpoq
Qaqortumi innuttaasut Tasersuarmi sikukkut angallannginnissaat politiinit kajumissaarutigineqarpoq, issangiarneratami kingunerisaanik siku saappallaalersimavoq angallavigissallugulu ulorianarpallaalersimalluni.
Allattoq Mads Lynge
Kujataani politiit innuttaasunit nalunaarfigineqarsimapput inuit Tasersuarmi sikukkut angallattut. Sikumi angallattut tassaanerupput meeqqat inuusuttullu.
Qaqortumi piffissami kingullermi issangiarpoq, tamannalu Tasersuup sikuanut soorunami sunniuteqarsimavoq saannerulersissimallugu.
Qaqortumi innuttaasut politiinit kajumissaarneqarput sikukkut angallannaveersaaqqullugit, tamanna ulorianarsinnaammat. Angajoqqaajusut aamma kajumissaarneqarput meeqqamik sikukkut angallannginnissaat eqqumaffigeqqullugu.
Kujataani politiini politikommissæriugallartoq Laila Fleischer tusagassiuutinut taama nalunaaruteqarpoq.