Assi: KNR/Arkiv

Tapiissuteqartarnermut inatsit siornatigumut naleqqiullugu maleqqissaarneqalersoq

Kalaallit inuusuttut arlallit nunani allani ilinniarnissamut ukiormanna akuerineqannginnerat inatsisip siornatigumut naleqqiullugu maleqqissaarneqalerneranik pissuteqarpoq.

Namminersorlutik Oqartussani Ilinniartitaanerit pillugit kiffartuussivimmi immikkoortortami pisortaq taama oqarpoq.
Kalaallimmi inuusuttut nunat avannarliit avataanni ilinnialernissamut qinnuteqarsimasut aatsaat taama amerlatigut ukiormanna akuerineqarsimanngillat.

Nunat avannarliit avataanni Namminersorlutik Oqartussat akiligaannik ilinnialernissamik qinnuteqartut Namminersorlutik Oqartussani Ilinniartitaanerit pillugit kiffartuussiviup ataani Immikkut akuersissuteqartarnermut ataatsimiititaliami naliliiffigineqarnerinut tunngatillugu inatsit ukiormanna maleqqissaarneqarpoq.

Ilinniartitaanerit pillugit kiffartuussivimmi pisortaq Daniel Gottrup taama oqarpoq:

- Immikkoortortami ingerlatseriaaseq aallartipparput, tamatumanilu nalunaarummut inatsimmullu ilinniagaqarnersiutinik aalajangersaaffiusunut tunngatillugu inatsisitigut sukumiinerusumik nalilersuisalerluta.

AAMMA ATUARUK Nunani allani ilinniarsinnaasut ikilisinneqarput

Ilinniagaqarnersiutit pillugit inatsit naapertorlugu, nunat avannarliit avataanni tamakkiisumik ilinnialernissamik qinnuteqartut aatsaat akuerineqarsinnaapput ilinniartitaaneq qinnuteqaatigineqartoq Nunatsinni Danmarkiluunniit ingerlanneqarsinnaanngippat, imaluunniit nunani avannarlerni ilinniartitaanernit assingunit "allaanerussuteqangaatsiarpat".

- Piumasaqaallu taanna naammassineqanngippat qinnuteqaat tunngaviatigut itigartittussaavarput. Ukiullu siuliinut naleqqiullugu ukiormanna nalilersuinerit sukumiinerusumik ingerlanneqarsimanasoraakka.

Ukiup affaani siullermi qinnuteqartunit katillugit 13-iusunit, assersuutigalugu Hollandimi, Kinami USA-milu ilinnialernissamik qinnuteqaateqartunit arfineq-marluk akuerineqarsimanngillat.


Inatsit ukiut siuliini maleqqissaarneqarsimanngitsoq

Ukiunilu arlertuni aatsaat taama amerlatigisut akuerineqanngitsoorput. Tamannalu inatsisip ukiut siuliini maleqqissaarneqarsimannginneranik pissuteqarnerpaagunartoq Daniel Gottrupip oqaatigaa:

- Suliat ataasiakkaat ilisimasaqarfiginngilakka, tamannali pissutaasinnaavoq. Aalajangiisarnitsinnili assigiissaarinerunissamik qulakkeeriumalluta kissaateqarnitsinnik pissuteqarpoq.

Naalakkersuisoqarfiit tamarmik aningaasanut inatsimmi kingullermi sipaarniaqqullugit peqquneqarput. Ukiormannali ilinnialernissamut akuerineqanngitsoortut sipaarniuteqartoqarneranut attuumassuteqanngitsut oqaatigineqarpoq.

- Aningaasaqarneq missingersuutilluunniit isiginiarneqarneq-ajorput. Aningaasartuutaapput inatsisitigut aalajangersarneqartut, inatsisip siunertaa sapinngisamik malinniarsariinnarparput.

 

Tapiissuteqartarnermut nutaanik malittarisassaqalissagunartoq

Inuusuttut nunat avannarliit avataanni ilinnialernissamik qinnuteqartut ikinnerusut tapiiffigineqartarnerat Københavnimi Kalaallit Illuutaanni ilinniartunik ilitsersuisup Pia Rosing Heilmannip isornartorsiorpaa.

Ilinniartitaanermut naalakkersuisoqarfimmi maannakkorpiaq nalunaarutissamik nutaamik suliaqartoqaleruttorpoq, tassanilu nunat avannarliit avataanni ilinniagaqarnerup kulturikkut pissarsiaqarfiusinnaanera aamma isiginiarneqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat