Nunani allani ilinniarsinnaasut ikilisinneqarput
![](/sites/default/files/styles/image_934x467/public/article_images/studenterdag2.jpg?itok=HlxKsCnE)
Tamannalu qinnuteqartunit Københavnimilu Kalaallit Illuutaanni ilinniartunik ilitsersuisunit uggornartinneqarpoq. Tassanimi isumaqartoqarpoq inuusuttut nunanut allanut ilinniariartortinneqartarneri siunissaq ungasinnerusoq eqqarsaatigalugu Kalaallit Nunaannut iluaqutaassasoq.
Hans Peder Kirkegaard Roskilde Universitetimi ukiuni pingasuni ilinniareerluni USA-mi South Carolinami International Businessimi Masteritut ukiumik ataatsimik sivisussuseqartumi ilinniarnissaminik Namminersorlutik Oqartussanut qinnuteqarpoq.
- Ilinniagaq taanna ilinniakkamut Danmarkimi ingerlanneqarsinnaasumut naleqqiullugu nunat tamalaat akornanni inatsisiliornermik aammalu nunani tamalaani naalakkersuinikkut ingerlatsinermik sammisaqarfiuvoq. Tamatumunngalu ilanngullugu Danmarkimi ilinniakkamut maanna ingerlatannut ilaasussaagaluarpoq.
Assingusimik Danmarkimi ilinniartoqqarsinnaareermat akuerineqanngilaq
Hans Peder Kirkegaardilli qinnuteqaataa Namminersorlutik Oqartussat Immikkut akuersissuteqartarnermut ataatsimiititaliaannit, nunat avannarliit avataanni tamakkiisumik ilinniagaqarnissamik qinnuteqaatinik suliaqartartumit akuerineqanngilaq.
Ilinnikkamut qinnutigisaanut assingusumik Danmarkimi akeqanngitsumik ilinniartoqarsinnaanera matumani tunngavilersuutigineqarpoq - nunamilu nunat avannarliit avataanniittumi ilinniagaqarnissaq - soorlu USA-mi - Namminersorlutik Oqartussanut aningaasartuutaassalluni.
Tamannalu Hans Peder Kirkegaardip uggornartoqartippaa:
- Akuerineqarsimannginnera paasigakku assut narrujuummissutigaara.
Qinnuteqartut affai akuerineqanngillat
Hans Pederili kisiartaanngilaq. Nunami nunat avannarliit avataanni tamakkiisumik ilinniagaqarnissamik ukioq manna qinnuteqaateqartunit 13-iusunit maannamut arfineq-marluk akuerineqarsimanngillat.
Taakkulu ukiuni kingullerni pingasuni aatsaat taama amerlatigipput, Københavnimi Kalaallit Illuutaanni ilinniartunik ilitsersuisoq Pia Rosing Heilmann, Danmarkip avataani ilinniarnissamik qinnuteqaatinik tamanik suliaqartuusoq taama oqarpoq.
- Nunani allani ilinniakkanut tunngatillugu ukiumi kingullermi sukaterisoqaqqissimanera maani Kalaallit Illuutaanni maluginiarparput.
Tamannalu uggornartoqartippaa. Ingammik inuusuttut ilinniarluarsimasut piginnaasaqartullu angerlateqqinnissaannik Naalakkersuisut kissaateqarnerat eqqarsaatigalugu:
- Ilinniartitsisummi allaanerulaarput, aamma atuakkat atuartitsissutigineqartut taamaapput. Taamaammat ilinniarsimanermut uppernarsaammi allassimasut assigiikkaluartut Danmarkimi pissarsiarineqarsinnaanngitsut pissarsiarineqartarput.
- Aamma isumaqarpunga Kalaallit Nunaata inuusuttunik ilinniarluarlusimasunik siammasinnerusumik ilinniagaqarsimasunik peqarnini iluaqutigisinnaagaa, Pia Rosing Heilmann, Københavnimi Kalaallit Illuutaanni ilinniartunik ilitsersuisoq taama oqarpoq.