Sugisap siulittaasortaava: Tapersersorneqarnissarput pisariaqaateqartorujussuuvoq
Ukiuni kingullerni 19-ini Sugisami siulittaasuusoq, Esekias Therkelsen soraarninngornermi kignorna siulittaasuujunnaarpoq.
Siulittaasunngortoq tassaalluni maannamut siulittaasup tullerisaa, Cecilie Marie Hardenberg.
Aningaasat peqatigiiffimmut tapiissutaasartut iluaqutsiullugit peqatigiiffimmi, ukiut 19-init ingerlaneranni ilaasortaat amerliartorsimapput.
Taamaattorli inuit isumaliortaatsimikkut napparsimasut innarluuteqartullu politikkikkut tapersersorneqarnerat naammaannarsimasoq, siulittaasutut tunuartoq, Esekias Therkilsen oqarpoq.
- Tassa kingumut eqqaassagukkit, qinersisoqartillugu Sugisamut soqutiginninneq annertusaqaaq. Tamassumali kingorna politikerinit politkkikkullu suliaqartunik atussuteqartarnerput anneruallaartarnikunngilaq, taanna oqarpoq.
Taassuma taama oqarnera siulittaasunngortup, Cecilie Marie Hardenbergip isumaqatigaa.
- Iluamik tapersersorneqarnerput misiginikuunngilarput. Kisianni tapersersorneqarnissarput pisariaqaateqartorujussuuvoq. Pissutigalugu isumaliortaatsikkut nappaatillit innarluutillillu ikinnginnamik nunatsinni, taakkulu pillugit suliniutaasartut ersarigatik, taanna oqarpoq.
Eqqartorneqartarnerat annikitsuararsuusoq
Cecilie Marie Hardenbergip qanigisaasa ilaat isumaliortaatsimikkut innarluuteqarput namminerlu PTSD-mik aamma bipolarimik innarluuteqartuulluni.
Taassumalu oqarnera naapertorlugu isumaliortaatsikkut nappaateqarneq innarluuteqarnerlu nunatsinni oqallisigissallugu suli paqumigineqarpoq.
- Isumaliortaatsikkut napparsimasut innarluutillillu pillugit eqqartuisarneq suli annikitsuararsuuvoq, aamma inuit attaveqaqatigiittarfiini tamanna malunnartarpoq. Tamanna politikkikkut tapersersorneqartuugaluarutta allanngortissinnaavarput, taanna oqarpoq.
Peqatigiiffik Sugisaq 2023-miit 2027-mut atuuttussamik nutaamik pilersaarusioqqammerpoq.
Pilersaarummi tassa innarluutilinnut sugisaasut ikiorneqarnerunissaat salliutinneqarpoq. Tamanna pillugu Cecilie Marie Hardenberg oqarpoq, sugisaasut ikiorneqanngikkunik ikorfartorneqanngikkunillu namminneq napparsimalersinnaammata tamanna salliutinneqarallassasoq.
- Sugisaq sugisaasunut ikiuissaaq. Taamaalilluni sugisat atugaasa oqinnerulernissaat anguniarneqassalluni. Tamassuma saniatigut peqatigiiffik Sugisaq sugisaasunut ataatsimoorfissamik piarfissiissaaq. Tassami pingaaruteqarpoq sugisaasut naapeqatigiillutik avitseqatigiissinnaanissaat, taanna oqarpoq.
