Innarluutillit illersuisuat Innarluutillit atugaat qineqqusaarnermi aamma sammineqarlik
- Qineqqusaartut inuit innarluutillit atugarisaat pisinnaatitaaffiilu aamma sammisariaqarpaat, Inuit Innarluutillit illersuisuat Christina Johnsen oqarpoq.
Aalisarnermut inatsit, mittarfiliornissat namminersulivinnissarlu kisiisa oqallisigineqartariaqanngillat.
Illersuisoq taama erseqqitsigisumik allappoq.
Allagaq taanna innarluutillit kattuffiannit, KNIPK-mit, nunatsinni ineriartornermikkut kinguarsimasunut angajoqqaajusut peqatigiiffiannit, Inooqammit, Nuummi gigtertut peqatigiiffiannit, Nanortalimmi Inuit Innarluutillit Peqatigiiffiannit, Danmarkimi nuna tamakkerlugu peqatigiiffiup Autismep nunatsinni immikkoortortaanit Sugisamillu atsiorneqarpoq.
AAMMA ATUARUK Meeqqat isumaat qineqqusaartunut anngunniarpai
Atukkat pitsaanerusinnaasut
Innarluutilinnut sullissisut suliassaat amerlavallaarput, inigisat pitsanngorsarneqartariaqarput klassinilu immikkut pisariaqartitsisuni atuartut soraarummeertut pitsaasumik naammassisaqarnissaat qulakkeerneqartariaqarpoq.
Suliat innarluutilinnut tunngasut kommunit tigummigaluarpaat politikerilli aamma ukkatarisussaagaat, Christina Johnsenip erseqqissaatigaa.
- Ilaatigut kommunit namminneerlutik suliassarujussuaq kivissinnaanngilaat. Kommunini sullissisut ilungersorput, tusartuagarput tassaavoq sulisut ikippallaarput suliassallu amerlavallaarput.
Isumaginninnermut siunnersortit sulinermi atugaat politikerit aamma eqqumaffigisariaqaraat, taassuma assersuutigaa:
- Taakku atugarisaat arlaatigut pitsanngortinneqarsinnaagunik taava innarluutilinnut iluaqutaassaaq, Inuit Innarluutillit illersuissuat Christina Johnsen oqarpoq.