Tapersersorneqarnertik nuannaarutigivaat

Nunatsinni palasimut ilinniartarneq atorunnaarsinniarlugu Naalakkersuisut periarfissarsiorniartut ilisimaneqalermalli, tamatuma piviusunngorsinnaanissaa pillugu Ilisimatusarfimmi sulisut teologiimillu ilinniartut ernumalerput, akerliliinerminnilu inuppassuarnit tapersersorneqarnertik nuannaarutigeqaat.
Allattoq Carla Davidsen
maajip 07-at 2012 06:59

Ilisimatusarfimmi lektori, ph.d, Flemming Nielsen, aamma immikkoortortami pisortaq, dr.theol., Aage Rydstrøm-Poulsen, tusagassiuutinut allapput.

- Biskop Sofie Petersenip Atuagagdliutini normu 18-ini issuarneqarnera pingaartumik nuannaarutigaarput, oqarmat, nunatsinni palasinngorniartarnerup attatiinnarneqarnissaa nammineq kissaatigalugu, bachelorillu amerlanerit palasinngortarnissaat neriuutigigini, uagullu tamanna tapersersoqaarput.

Palasimut ilinniartarnerup nunatta piumasai malillugit pisarnissaanut ilagiit suleqatigerusuppavut, taamaalilluni, ilisimatusarneq annikillisinngikkaluarlugu, toraagaq annertunerussammat.

Aamma pastoralseminariami Kalaallit Nunaanni palasinngorniartoqartalernissaa pillugu ilagiinnik suleqateqarusuppugut.

Kalaallit Nunaanni palasinngorniartarnissaq ajunnginnerpaamik qanoq isumagineqarsinnaanersoq pillugu ilagiinnik allanillu soqutiginnittunik oqalliseqateqarnissarput qilanaaraarput, Ilisimatusarfimmi lektori, ph.d, Flemming Nielsen, aamma immikkoortortami pisortaq, dr.theol., Aage Rydstrøm-Poulsen, naggasiipput.

 Naalakkersuisut ilinniartitsinermut periusissaq  pillugu nassuiaat  maajip 30-ani saqqummiutissavaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq