Tanbreez itigartitaaneragaasoq

Tamannali ilumuunngitsoq, qinnuteqaalli suli suliarineqartoq, Aatsitassaqarnermut naalakkersuisoq oqarpoq.

- Isumaqatigiinniarnerit suli ingerlapput, Jens Erik Kirkegaard taama oqarpoq.

Aleqa Hammondip Naalakkersuisut nittartaagaani erseqqissaatigaa piumasaqaatit annertusineqarnerat isumaqanngitsoq qinnuteqaat itigartinneqartoq, kisianni erseqqissaannarneqartoq pissutsit taakkua pitsaanerusumik qulaajarneqarnissaat Naalakkersuisut kissaatigigaat.

Tassalu aatsitassaqarnermut Naalakkersuisup erseqqissaatigaa isumaqatigiinniarnerit suli ingerlanneqartut.

- Naluneqanngitsutuut tusagassiortut inuinnaagamik aamma paatoorsinnaallutik kukkullutik issuaasinnaapput. Taamaammat nammineq tassani najuutinnginnama Reutersip issuaasimanera akuersissut itigartinneqarsimasoq - taanna maangaanniit oqaatigisinnaavarput ilumuunngitsoq, Jens Erik Kirkegaard oqarpoq.

Isumaqatigiinniarnerit suli ingerlanneqartut, Aatsitassaqarnermut Naalakkersuisoq erseqqissaavoq.

Taassumali oqaluttuaraa, Naalakkersuisut Tanbreez Greenland A/S-imut piumasaqaataat annertusineqartut. Tassa suliniutip avatangiisinut aamma inuiaqatigiinnut sunniutigiumaagaanut tunngasunik Tanbreez Greenland A/S-ip misissuinini annertusassasai suliaqassasoq piumasaqaatigineqarmat.

Aatsitassanit ikummatissanullu inatsimmi ilaatigut misissuinissamut piiaanissamullu akuersissummik tunineqarsimasoq sulisartut kalaallit qanoq atorneqartiginissaat aalajangerneqarsimavoq. Aammali aatsitassarsiorniartoq uuliasiorniartorluunnnit Nunatsinneersunik piginnaasaqarluartunik sulisussarsisinnaangikkuni, nunani allaneersunik aamma sulisoqarsinaavoq.

Suliffeqarfiillu nunatsiittut saliutillugit atorneqarnissaat piumasaqaataagaluartoq, nunani allaneersut atorneqarsinnaapput, Kalaallit Nunaanni suliffeqarfiit teknikkikkut niueqatigiinnikkulluunniit unammillersinnaassuseqanngippata.