Nunavik: Tammajuitsussarsiniarluni tuttunniartitsisarneq Inuit unitseqqugaat

Nunavimmi tuttut ikileriangaatsiarsimapput, tuttoqatigiimmi The Leaf River Herdimik taaguutillit ukiuni kingullerni 50 procentinik ikileriarsimasut kisitsinerit takutippaat.

Tuttoqatigiit The Leaf River Herd 2011-mi 430.000-it missaanniipput, kingullermillu kisitsisoqarmat 200.000-it missaanniilersimallutik. Tassa amerlassutsimikkut affaannanngorsimapput.

Adamie Alaku, Nunavimmi naggueqatigiit Inuit suliniaqatigiiffianni Makivik Corporationimi præsidentimut tullersorti, Nunavimmilu piniarnermut aalisarnermullu ataatsimiititaliami aamma ilaasortaq tusagassiuutinut ima oqarpoq:

- Tuttut nerisarisatsinni pingaarnernut ilaapput. Tuttut nerisassanik Canadap kujasissortaanit eqqussukkanik imaaliallaannarlugit taarserneqarsinnaanngillat. Inuussutissaqarpianngillat akisuallaarujussuarlutillu, Adamie Alaku, Makivik Corporationimeersoq oqarpoq, nangillunilu:

- Kina tuttumik nassuginnerpaamik pisaqarsinnaanersoq unammisitsissutigineq ajorparput, soorlu tammajuitsussarsiniarluni piniartartut taamaattartut. Inuussutissaqarluarnissarput Nunavimmi uagut pingaartitaraarput, piniarsinnaatitaanissarpullu qulakkeerumallutigu, oqarpoq.

Tammajuitsussarsiniarluni piniartitsisarnerup unitsinneqarnissaa, Nunavimmi piniarneq aalisarnermullu ataatsimiititaliap Makivik Corporation peqatigalugu ukiuni kingullerni arfinilinni sukataarutigisimavaa, tuttut ikiliartupiloornerat paasinarsimmat.

Makivik Corporationip maanna taamaammat erseqqissumik oqaatigaa: Tammajuitsussarsiniarluni piniartitsisarneq unitsinneqarli!

Quebecimi ministereqarfiup inatsisartullu maanna tamanna tassa immaqa aalajangiiffigisussanngorpaat.