Tamatta inissaqartariaqarpugut

Politikerit arlallit - pingaartumik illuatungiliuttuneersut - akerartorneqartarnerat qitserarfigineqartarnerallu piffissami kingullermi tusagassiutini sammineqarput. Aamma allat narrujuumminartunik e-mailikkut allaffigineqartarput, allallu aqqusinermi pisutsillutik suaartarfigineqartarlutik, Steen Lynge allappoq nangillunilu:

- Politikerinik taamatut saassutarinnittoqarnera saassussisup saassutami politikkianut isumaqataannginneranik tunngavilersorniarneqartarpoq. Aamma politikerit taamatut saassutarineqarsimasut naalakkersuisuit siuliini ilaasortaasimasuupput, politikkiminnillu nunatsinnik aserorterisimasutut pisuutinneqarlutik.

Nunami tamat oqartussaaffigisaanni tamanna naleqqutinngilaq. Saassussinerit qanoq ikkaluartulluunniit akuerineqarsinnaanngilluinnarput.

Taamaaliortoqartarnera akuersaarsinnaanngilarput, aamma politikkikkut suliniartuulluni nunamik aserorteriniartutut pisuutitsinerit akuersaarneqarsinnaanngilluinnarput.

Tamat oqartussaaqataanerat ammasunngortillugu tamatta suleqatigiilluta inerisassavarput, kinguneqartussamik isummersuutit tamaasa inissaqartillutigit. Pingaartumik inuiaqatigiinni ikinnerussuteqartut illersugassaraagut - aamma illuatungiliuttuugaluarpataluunniit - tamannalu isumaliortaatsit isummersuutillu qanoq ikkaluartut ataqqinnerisigut angusinnaavarput. Aamma isumaqatigiinngikkaluarluta.

Inuup isumaqatiginngisatta politikkikkut allatut isumaliortaaseqarnera apeqqutaatinnagu immitsinnik ataqqeqatigiinnerput Nunatsinni ilisarnaatigiuaannarsimavarput.

Aamma tamatta immitsinnut ilisarisimanerput tamanit naluneqanngilaq, ilisarisimanngisavullu ilisarisimatta ilisarisimasarpaat.

Tamatta immitsinnut atassuteqarpugut, aamma immitsinnut ilisarisimanngikkaluarluta. Atassuteqaatigaarput nunami maani tamatta inooqatigiinnerput - politikkikkullu isumaliortaaseq apeqqutaatinnagu - sapinngisamik pitsaanerpaamik iliortuulluta.

Taamaammat politikkikkut isumaliortaatsit apeqqutaatinnagit, inunnik allanik oqaatsitsigut allatulluunniit akerartuilluni iliuuserineqartut akuersaannginnissaat tamatta pisussaaffigaarput. Allanut ataqqinanngitsumik pissusilersortoqartillugu   qisuariarfiginissaanut tamatta pisussaaffeqarpugut. Naleqqutinngitsuliortoqartillugu,  tamakku unitsinniarlugit akuliuttassaagut isiginnaartuuinnarata, Steen Lynge allappoq.