TAMASSA ataasinngorpat aallarteqqissaaq

Aallakaatitassiap nuannarineqarluartup TAMASSA-p ukiup aallartinnera aallakaatitassanik nutaanik piareersaanermut atorsimavaa, isiginnaartartullu sapaatip akunnerata tullianit aallakaatitami ingerlatsisut ilisarisimaneqarluartut, Hans Jukku Noahsen Arnánguak Lyberthilu malittareqqissinnaalissavaat.
Allattoq Peter Troelsen, Simon Uldum
januaarip 11-at 2013 10:14

TAMASSA ataasinngornerit, pingasunngornerit tallimanngornerillu tamaasa, piffissat Nunatsinni qinersiffiusut minillugit,  aallakaatinneqartassaaq. Inatsisartunutr qaqugu qinersisoqassanersoq Kuupik Kleistip kisimi akisinnaavaa, kommunalbestyrelsinulli sisamaasunut apriilip aapaani qinersisoqassaaq.

- KNR-imi sulisoqarnikkut erseqqilluinnartunik unammilligassaqarpugut. Taamaammat teknikkikkut sulisorineqartut qinersinernut atatillugu atorneqartussanngorpata TAMASSA suliarisinnaanngilarput. Tv-kkut aallakaatitsinngikkaangatta, taarsiullugu piffissaq aallakaatitassiassanik piareersaanermut atortarumaarparput, Heidi Møller, 2013-imi Tamassami aaqqissuisunngortoq oqarpoq.

Aningaasaliisut isiginnaartartullu TAMASSA soqutigisupilussuusimavaat aallakaatitassianullu nutaanut immersuisoqarsimalluni. Aliikkutassaqartitsineq. qaammarsaaneq isumassarsiorfigineqarsinnaasullu siunissami aamma oqallissaarutinik ilaneqassapput.

- Paqumigineqartut, inuunermi attortinnartut, ineriartornerit imaluunniit ineriartorfiunngitsut sammineqassapput. Naatsumik oqaatigalugu, sammisat isiginnaartartut imminnut tunngasutut misigisaqarfigisinnaasaat, Heidi Møller oqarpoq, peqatigisaanillu aallakaatitassat siullersaata januaarip 14-iani nal. 18.00 aallakaatinneqarnissaa erseqqissaatigalugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq