Frederik Olsen Facebookimi sapaatip akunnera kingulleq allappoq massakkut aappanilu panimmik Manuminap toqqusaamigut neqaarsinnermi kingornatigut Dronning Ingridip Napparsimmavissuani  3. juuni  toquneranik suliaq pillugu eqqartuussissuserisumik misissuisitsiniarlutik.

Ullullu marlussuit kingornatigut tassanngaannaq Peqqinnissamut Naalakkersuisoqarfimmit sianerfigitipput. Taava ilaqutariit tassanngaannaq peqqissutsimut naalakkersuisumik Agathe Fontainimik (IA) allaffiani namminersorlutik oqartussat illorsuanni napasuliaasarsuarmi ataatsimeeqatiginninnissaminnut aggersarneqarput.

Aggersaaneq Frederik Olsenip tupigusuutigisaa:

- Piffissalerneqarnerata eqqarsalersippaanga arlaannik pissuteqartoq. Soorlumi suliaq nipaarsaaruteqqugaat. Immaqa sooq taama pisoqarsimanera nassuiarsinnaanginnamikku, oqarpoq.

Qaammatini arfinilinni angajoqqaajusut iluatsinngitsumik peqqinnissaqarfimmi akisussaasunit akissutissarsiniarsariagaluarput. Iluatsitsinngitsoorlutik.

Taamaakkaluartoq Agathe Fontainip suliaq ataaseq saappaa 

Tassanngaannarli peqqissutsimut naalakkersuisup angajoqqaajusut oqaloqatigerusulerpai apeqqutissarpassuilu akiumallugit.

Pingaartumik Frederik Olsenip tupigusuutigaa Agathe Fontainip angajoqqaat allaffimminut aggersarmagit tusagassiuutinut oqaraluarluni suliat ataasiakkaat oqaaseqarfigisinnaanagit:

- Aamma naalakkersuisoq aperaarput sooq suliat ataasiakkaat tigusinnaanngikkai, taavalu tassanngaannaq ataatsimeeqatigilerparput. Akivoq allagaannartigut akissalluni peqqarniippallaartoq nangillunilu:

- Taamaalimmmat akivara akissutit tamaasa allaganngorlugit tigorusullugit, massakkummi eqqartuussissuserisup suliaq tigummagu, oqarpoq.

Angajoqqaajusut Agathe Fontainimik ataatsimeeqateqartinnagit nunatta nakorsaaneqarfianik arlaqaqisunik allaffeqatigiittoqartarpoq.  Tassami Manuminap toqunera pillugu suliaq Nunatta Nakorsaaneqarfianiikkaluarpoq – kisianni massakkut nakorsaaneq oqarpoq suliaq tigummiunnaarlugu. Naak angajoqqaanut oqarsimagaluarluni nammineerluni isumaginiarlugu suliap naammassineqapallaannissaa:

- Massakkut akivaanga suliaq massakkut suliarisinnaanagu. Disciplinærnævnet-imut (Pissusissanik malinnilluarsimanermik aalajangiisartunut) ingerlateqqinneqarsimavoq, nittartagaannullu adressia uannut mailerutigalugu. Ilumut taamatut suliamik iperaaginnarnera peqqarniik, Frederik Olsen oqarpoq. 

Angajoqqaat naapertorlugit aamma nakorsaaneq oqarpoq suliamik ingerlatsineq ukiup affaata missaanik sivisussuseqassasoq ilimagissagaat, suliamillu ingerlatsinera maalaarutiginiarunikku peqqissutsimut naalakkersoq unnersuussutigalugu.  

- Isumarput naapertorlugu akisussaaffimminik iperaavoq. Suliap ingerlanneqarnera peqqissutsimut naalakkersuisumut ingerlateqqiinnarneqarpoq, Frederik Olsen oqarpoq.

Nutaaqanngilaq

Manuminap angajoqqaavisa ataatsimeeqatigineranni Agathe Fontainip aalajangersarpaa suliaq aamma nammineq tigumminagu, Frederik Olsen oqarpoq. Taarsiullugu nakorsaaneq unnersuussutigaa oqarluni taanna suliap suliarinissaanut akiusussaasuusoq.

Tassalu Manuminap alianartumik toqunera pillugu suliaq tassaniippoq. Soorlumi. Oqaatigineqareersutummi nakorsaanerup suliaq Danmarkimi Disciplinærnævnet-imut nassiussimavaa, taassumalu aalajangissavaa nakorsatut sulinermi kukkusoqarsimanersoq. 

Taanna tunngavigalugu Kalaallit Nunaata Politiivi aamma oqaluttuarput suliaq namminerminni ingerlassinnaanagu nakorsaaneqarfimmit suliarineqartinnagu, taassumalu Disciplinærnævnet-imi naammassillugu suliarineqarnera utaqqivaa. 

- Politiinut nalunaarutigigatsiguli nakorsaanermullu malaaruteqarluta nutaaqanngilaq. Ukiup affaa kamanneq misigissutsitigullu naalliutsitaaneq, Frederik Olsen oqarpoq nangillunilu:

- Ataatsimeereeratta anigatta aasartulli misigisimaneq akissutillu taakku pigaavut. Soorlumi sapinngisaminnik sivitsorsaaginnartut.