Tamaat isigalugu: Nunarput qaqugu ammaqqissava? Ulluni arlalinni suli killilersuisoqassaaq
Inuit qulit coronamik maannamut tunillatsissimasut paasineqarsimalerput. Taakku tamarmik Nuummiipput.
Pingasut peqqisseqqissimalereerput.
Nunatsinni coronavirusimik tunillatsissimasoq siulleq marsip ulluisa 16-iani paasineqarpoq - nualluutillu nunatsinnut anngunnerata kingorna timmisartuussinerit unitsinneqarput, atuarfeqarfiit meeqqeriveqarfiillu Nuummi matugallarneqarput. Tassa Nuup annerpaartaa maanna matoqqavoq.
Naalakkersuisut Tunillaassortunik nappaalanersuaqarneranut ataatsimiititaliarsuup coronavirusip tuniluutilertunnginnissaa anguniarlugu inerteqqutinik innersuussutinillu sukannersunik assigiinngitsunik aalajangersaapput. Taakkualu tamaasa isigalugit ataani atuaqqikkit:
Nuuk nunallu sinnera:
Timmisartuussinerit apriilip arfineq-pingajuata tungaanut unitsinneqarput.
Danmarkip nunattalu akornanni timmisartuusseqqusaanngilaq, inuiaqatigiinnulli suliaqartunut pingaarutilinnut timmisartuussisoqarsinnaalluni.
Nunap iluani timmisartuussinerit aamma unitsinneqarput.
Nuuk: Killilersuinerit apriilip arfineq-pingajuata tungaanut atuuttut
Inerteqqutit killilersuinerillu uku Nuummut kisimik atuupput:
Inuit amerlanerpaamik qulit ataatsimoorsinnaapput.
Ilinniarfeqarfiit ulluuneranilu paaqqinniffiit matoqqapput. Inuiaqatigiinnut pingaarutilimmik suliaqartut kisimik meeqqaminnik paaqqinnittarfiliaassisinnaapput.
Nuuk Centeri, qitigiartarfiit imerniartarfiillu matoqqapput. Neriniartarfiit aamma matoqqassapput. Taakkuli annissanik pisiniarfigineqarsinnaanissaat periarfissaassaaq.
Nuummiit aamma aallarsinnaanngilatit – aamma nammineq umiatsiannik. Aqisserniarsinnaavutit aalisariarsinnaallutillu – kisianni Nuummut angerlaqqittassaatit. Sumiiffinnut allamukaqqusaanngilluinnarputit.
Pisiniarfiit ammaannassapput – pisinialli imminnut 2 meterinik ungasitsigisassapput
Naalakkersuisut sivitsuinngippata killilersuinerit tamarmik aprilip arfineq-pingajuata tungaanut atuutissapput.
Nuummi Qeqertarsuatsiaani Kapisilinnilu imigassaarniarneq apriilip 15-iata tungaanut matuneqarput.
Nunap sinnerani: Killilersuinerit apriilip arfernata tungaanut atuupput
Aaqqissuussat inunnit 100-nit amerlanerusunit peqataaffigineqartussat nangaasaarutigineqarluinnarput.
Illoqarfinni annerni bussit issiavii sinnerlugit ilaasoqaqqusaanngilaq.
Timersortarfiit, naluttarfiit sutorniartarfiillu isersimasorisinnaasatik affaannaat isersimatittassavaat.
Napparsimmavinnut, utoqqaat illuinut illuutinullu allanut aarlerinaateqarfiulersinnaasunut pulaarfigineqaqqusaanngillat.