Talerperliuniat Savalimmiuni naalakkersuisunngortitsipput
Talerperliuniat partiivi sisamat naalakkersuisunngortitsipput, tassaasut Sambandspartiet, Danmarkimi Venstrenut assersuunneqarsinnaasut, aamma Folkeflokken Danmarkimi De Konservativinut assersuunneqarsinnaasut kiisalu partiit minnerit marluk qiterlerneersut, taakkua aapparalugit Midflokken upperluarniartuusut.
Savalimmiuni Socialdemokratit qinersinerup tungaanut naalakkersuisoqataagaluartut, illuatungiliuttunngorput. Inatsisartuni Lagtingimi 33-nik ilaasortaqartuni, Naalakkersuisunngortut 19-inik tunuliaqutaqarput.
Sambandspartip Danmarkimit ataatsimoortumik tapiissutit isumaqatigiinniutigineqaqqinnissaannik kissaataata Naalakkersuisunngortitsinermi isumaqatigiissutini ilanngunneqarnera tupaallaataanerpaasoq, Savalimmiut Radiuanneersup Jon Brian Hvidtfeldtip oqaatigaa.
Danmarkimit ataatsimoortumik tapiissutit 2002-mili allanngortinneqarsimanngitsut, akit najoqqutaralugit aaqqiivigineqarnissaat, Savalimmiuni partiini arfineq-pingasuusuni Sambandspartiip kisiartaalluni qineqqusaarnermi piumasaqaatigaa.
Sapaatit akunnerini arlalinni isumaqatigiinniartoqareersorlu Sambandspartiip partit naalakkersuisoqataasussat allat pingasut piumasaqaatiminik tamatuminnga akuersisippai, maannalu Danmarkimit ataatsimoortumik tapiissutit isumaqatigiinniutigineqaqqinnissaat pillugu Danmarkimi naalakkersuisut pisortatigoortumik saaffigineqareerput.
Naalakkersuisunngortitsinermi isumaqatigiissutigineqartuni allannguut pingaarutilik alla tassaavoq, akileraartarnikkut iluarsartuusseqqinnissamik isumaqatigiissut. Matumani Savalimmiormiut tamarmik ukiumoortumik 65.000 koruuninik ilanngaateqartinneqassapput, isertitamillu sinnerinut assigiimmik procentimik akileraartassallutik, qanoq isertitaqartiginerat apeqqutaatinnagu. Tassa Nunatsinni aaqqissuussinermut assingusumik akileraariaaseqalissallutik.
Tamatuma kinguneranik Savalimmiormiut pisuunerpaat akileraartarnikkut oqilisaavigineqassapput, nunallu karsianut 250 aamma 300 millionit koruunit akornanni amigaateqartoqalissalluni.
Taakkua isertinniarlugit Savalimmiormiut soraarnerussutisiassatut katersugaat akileraaruserneqartalissapput. Taamatut allannguineq 200 millionit koruuninik isertitsissutaassaasoq ilimagineqarpoq, amigaatigineqalersussallu sinneri Danmarkimit ataatsimoortumik tapiissutit qaffannerisigut matussuserneqarnissaat neriuutigineqarluni.
Savalimmiuni sulisartut peqatigiiffiisa isumaqatigiillutik soraarnerussutisiassat akileraaruserneqartarnerinut nutaamik aaqqissuusinermut akerliunertik ullumi nalunaarutigaat. Akileraartarnermik aaqqissuussineq nutaaq 2012-imi januaarip aallaqqaataanit atuutilissasoq naalakkersuisunngortut kissaatigaat.
