Talerperlernik ingasaassiniaasartut 25-t nunap naalakkersuisoqarneranik uppititsinissamut pilersaarusiorsimasut Tysklandimi tigusarineqartut

Tysklandimi pingasunngornerup ullaavani politiit pitoraanneranni inuit minnerpaamik 25-t tigusarineqarput.

Tigusaasut tassaapput talerperlernik ingasaassiniaasartut peqqarniisaarniaqatigiinnullu ilaasortaasutut pasineqartut, naalagaaffeqatigiiffiup unnerluussisussaatitaat Berlinimiittoq taama ilisimatitsivoq.

- Tigusaasut peqqarniisaarniaqatigiinneersuupput Tysklandip naalakkersuisoqarneranik piusumik uppititsinissamik namminnerlu taarsiisussatut anguniagaqartuusut, anguniagartillu angorusunneranni naalagaaffimmut nakuusernissaq ilaavoq, unnerluussisussaatitaasoq oqarpoq.

Pingasunngornerup ullaavani pitoraannermi politiit 3000-t sinnerlugit peqataapput. Naalagaaffiup immikkoortortaani minnerpaamik 11-ni illuni inissianilu 130-nit amerlanerusuni pakasaalluni misissuisoqarpoq. Aammattaaq Østrigimi Italiamilu tigusarinnittoqarpoq.

Pasineqartut ilarivaat ingerlarianermik Reichsbürgerimik taaneqartartumeersut ilaasortat, tyskit aviisii taama allapput. Ingerlariarnerup taassuma Tysklandi naalagaaffeqatigiifiusutut akuersaanngilaat talerperlernillu ingasaassiniaasartut aamma juutinillu akerliliiniartut isumaannik ingerlateqqiikkajuttarlutik.

AAMMA ATUARUK Tyskit sakkunik pisinissartik pillugu, nunami aaqqissuusseqqinneq allanngortippaat

Kunngikkormiunut ilaasortaasimasup, Heinrich XIII P. R.-mik kinaassuserneqarsimasup, siunissami naalagaafissaanni aqutsisutut ivertinneqarnissaa uppititsinissamut pilersaarummi ilaavoq. Heinrichip prinsitut taaguutini atorpaa kunngikkormiullu kinguaariit Reuss-iminngaanneersuulluni Tysklandip kangiata immikkoortuini naalakkersuisuusimasut.

Peqqarniisaarniaqatigiit russit aallartitai attavigisimagaat oqaatigineqarsimavoq, tamannalu aaqqissuussamik nutaamik pilersitsinissamut pingaaruteqartorujuusimavoq. Attaveqarsimanerilli taakkua uppernarsaatitaqanngillat.

Ruslandi attaveqaqateqarsimaneranngitsoq

Pitoraannermi arnaq russeq tigusarineqarsimasoq nalunaarutigineqarpoq. Russit nutaarsiassassaqartitsiviat Tass allappoq russit aallartitaqarfiat tigusarinninnermut tassunga ilisimanninngitsoq.

Berlinimi russit aallartitaqarfiat nalunaarpoq Ruslandi naalagaaffittut ”tyskit peqqarniisaarniaqatigiivinut” atassuteqanngitsoq.

 Reichsbürger eqimattakkuutaanut nynazistinut sisamanut attuumassuteqarpoq. Ingerlariarnerup 21.000-nik tapersersuisoqarnera tyskit isertortumik paasiniaasartuisa missiliorpaat.  

Tyskit illersornissaqarfianni Bundeswehrimi sakkutooq ataaseq sakkutuujusimasullu arlallit tigusarineqartut ilagaat, tyskit tusagassiuutaat taama nalunaaruteqarput.

”Peqqarniisaarniaqatigiittut pasisat” avissaartiterneqarneri Tysklandimi inatsiseqarnermut ministerip, Marco Buschmannip, Twitter-ikkut nersualaarpaa.

- Tysklandip tamat oqartussaassuseqarnini illersorsinnaagaa pingasunngornermi pitoraannerup ersersippaa, Buschmann oqarpoq.

Tamassuma saniatigut Tysklandip nunanut allanut tunngasunut ministeria, Nancy Faeser, oqarpoq tamat oqartussaanerannut akerliusunut eqimattanut tunngatillugu naalakkersuisoqatigiit periutsimik sukannersumik ingerlassinertik attassagaat.

- Eqimattanik talerperlerpaamiittunik paasiniaaneq Reichsbürgerip avatangiisiinik Tysklandip naalagaaffittut piuneranik akerliusunik pillugu itinerusumik takutitaqallatsitsivoq, Tysklandip nunanut allanut tunngasunut ministeria, Nancy Faeser, oqarpoq.

Der Spiegel allappoq Tysklandimi inatsisartunut qinersisoqarnerani uppititsinissamut pilersaarutit ilaatigut imaqarsimasut. Amerlasuut sakkunik atuinissamut sungiusarneqarsimagatippaat.

Pasineqartut uppititsinissamut novembari 2021-miilli pilersaarusiorneqarsimagatippaat. Uppititsinissamut pilersaarusiamut piareersarnermi ilaatigut atortunik pissarsinerit, nutaanik ilaasortassarsiorneq aallaasinillu atuinermut sungiusarnerit ilaatinneqarsimagatinneqarput.