Takunneqqaartoq: Kinguaakka periarfissarsiuukkusuppakka
Nuugaatsiarmiu Jens Mikaelsen 2017-imi juunip 17-iani, tassa ukiut sisamarluinnaat matuma siornatigut, Nuugaatsiamiippoq. Ernummaammernartumik aasarimmi seqernup tarrissaarnernerani unnukkut malussarpoq.
- Anillallunga tassaariarneq siullerpaaq tassami ulinnersuaq siullerpaaq paasigakku, kangillermi sermersuaqarmat taanna nakkarsimasorsuartut isigalugu Nuugaatsiami Narsarsuaartukkatsinni arsartut suaartarsimavakka, ernera umiatsiani avalaateqqullugu, Jens Mikaelsen, KNR-mut takunninnerminik oqaluttuarpoq.
Nuugaatsiarmiut malissuarnit amutikkumanatik qaqqamut qimaapput. Nunaqqataasulli sisamat malissuarnit amusaallutik ajunaarput, nassaarineqaratillu.
Imminut pisuutittartoq
Tassaarsuarmik malussaqqaartoq ulloq manna tikillugu imminut pisuutittarpoq.
- Eqqarsaatigisarpara immaqa ingerlaannaq qimarrannissaannut suaartarsimasuuguma - nalunngittuugukkumi - ajunaartoqarsimassanngikkaluartugut. Ila amiilaarnarnermut eqqarsaatigeqqissaartaalerlugu taamatut pisoqarnera ilaatigut uannut ila pisuutittarlunga allaat ajunaartoqarmat, Jens Mikaelsen oqarpoq.
Eqqarsaataali aamma allanngortaqaat.
- Ilaanni eqqarsalertarlunga immaqa 2 minutsi, 3 minutsi kingusinaarlunga paasisimasuugukku immaqa amerlanerpassuarnik ajunaarneq kinguneqassagaluartoq, Jens Mikaelsen oqarpoq.
Misingeqqikkusunngikkaa
Qaqqarli alla aamma nakkaaratarsinnaasoq paasineqarmat, oqartussat Uummannami nunaqarfittaanilu innuttaasunik qaammat kingulleq ataatsimeeqateqarput. Jens Mikaelsenilu taassuma kingorna allatut eqqarsartariaqarsorilerpoq, tassaarsuarmi misigeqqikkusunngeqaa.
- Taamaattoqannginnera sioqqullugu kinguaakka periarfissarsiuuterusuppakka. Ila, periarfissaqassappat allamut illoqarfimmut immaqa inuussutissarsiorsinnaaneq alla aallaavigisariaqassammassuk. Taakku naleqqussartariaqaramik.
Jens Mikaelsenimummi kinguaat uloriatsaalinissaat pingaarpoq.
- Timmiaaqqat piaqqatik qimarnussinnaappatigit sooq uagut inuit eqqarsarsinnaanngilagut uloriananngittumut ilaa qimarratissallugit kinguaavut.
