Takornariussuit sillimaniarnikkut piareersimaffigineqanngillat
Umiarsuarujussuit takornarianik angallassisut, umiarsuillu assartuutit, nunatta imartaani angalasut amerliartuinnarput. Takornarianik sullissisunut tamanna nuanneraluaqisoq illuatungeqarpoq. Umiarsuarujussuit imartani uuttortaavigineqarsimanngitsuni angalagajuttarput, tamannalu Kangilinnguani sakkutooqarfimmit ernummatigineqarpoq.
Umiarsuit takornarianik angallassisut kusanartaqaat ilaallu angisoorsuusarlutik. Takornarianik amerlasuunik ilaasoqartarput, amerlanerit 1.000-t sinnerlugit ilaasoqarsinnaasarlutik. Takornariat nunatsinnut aningaasatigut isertitsilluartaraluartut, taamaattoq umiarsuit amerliartorneri Kangilinnguani sakkutooqarfimmit ajutoortoqarsinnaanera eqqarsaatigalugu ernummatigineqarpoq.
-Umiarsuit amerlanerit nunatta imartaani angalaartut nunatsinni angalaassallutik sungiusimanngilaat. Qujanartumilli ilaat ilisimasalimmik ilaasoqarsinnaasaraluarput. Ernummatiginerpaasarput tassaavoq takornarianik angallassisut ilaat ajutoornissaat, soorlu ikuallalluni, ikkarlilluni sikumulluunniit aporluni, taamaalillunilu immalerluni. Taamatut pisoqassagaluarpat ilaasut tamarmik umiarsuarmit qimagussortinneqartussaapput, nunatsinnilu atortut eqqarsaatigissagaanni tamanna ajornarluinnassaaq. Qulimiguullit pigisagut ikittuinnaapput, taamaattorli nunat sanilerisagut Island Canadalu ikiuussinnaanersut aperisinnaavagut, tamannali piffissartuutaangaatsiartussaavoq. Taamaammat inunnut 1.000-inut annaassiniarnissaq ajornakusoortorujussuusussaavoq, Kangilinnguani Sakkutooqarfimmi orlogskaptajn-iusoq oqaluttuarpoq. Ilanngullugulu oqaatigaa, annaassiniartoqassagaluarpat umiarsuit takornarianik angallassisut allat ajutoortumut qaaqquneqassagaluartut, taakku ilaasut tigusinnaassammatigit.
