Takornarissat takornariaqartitsisullu naapissapput

Takornariaqarnermi saqqummersitsineq, Vestnorden Travel Mart, sapaatip akunnerata naanerani Nuummi pissaaq.

Kalaallit Nunaani ukioq manna saqqummersitseqatigiineq pissammat allaanerusumik ingerlanneqassaaq.

Pinngortitaq kisiat pinnagu inuussutissarsiutinut tunngasunik saqqummiussisoqassaaq, suliffeqarfiit Kalaallit Nunaanni inuussutissarsiutitigut qanoq ingerlatsinertik saqqummiussallugu. Takornariartitsivik Visit Greenland taama nalunaarpoq.

-Pinngortitap kusanartup tunua tungaani inoqarpoq sunilluunniit suliaqarsinnaasunik. Taanna takutinniarlugu aningaasaliisut qaaqqusimavagut neqeroorfigalugit sammiussinissaanut, Mads Daniel Skifte taama oqarpoq.

Vestnorden Travel Mart, Savalimmiut, Islandip aamma Kalaallit Nunaata paarlakaajaallutik ingerlattarpaat. Takornariaqarnermik inuuniuteqartut naapittarput, aaqqissuussinerlu ukiumoortumik ingerlanneqartarluni.

Takornariat, takornariartitsisullu imminnut naapinnissaminnut periarfissaqartarput. Taamaalillutik atuisullu inuussutissarsiortullu qanoq suleqatigiilersinnaanissaminnut oqallittarlutik.

Vestnorden Travel Mart ukioq manna 300-t missaannit peqataaffigineqassaaq.

- Saqqummersitsisut aamma pisiniartartut namminnut naapisapput oqaloqatigiillutik. Qanoq isumaqatigiissusiorsinnaallutik imaluunniit pisiniartartut isumaqatigiissusiussapput sinerissami sumi takornarialerisunik suleqateqassallutik, Visit Greenlandimit Mads Daniel Skifte taama oqarpoq.

Ilasseqatigiinneq naapinnerlu Katuami tallimanngorpat aallartissaaq, tamatumalu kingorna ataatsimiinneq aallartissalluni.

Nunat Avannarliit nutaarsiassaatitik arfininngorpat saqqummiussavaat, taavalu takornarianut saqqummiussineq ualikkut Inussivimmi aallartissalluni, sapaatillu tungaanut ingerlanneqassalluni.

  Visit Greenlandip nutaarsiassaatitik saqqummiutissavaat. Nittartagartik nutartersimavaat takornarianut ataasiakkaanut naleqquttunngorlugu aamma ilaatigut kisitsisit takornariartitsinermut tunngasut takutinneqassapput.

Takornarianik amerlanerusunik takornariartitsisalernissaq saqqummiussinerup siunertaraa.

- Neriuppugut takornariat amerlanerusut takkukkumaartut aamma saniatigut Kalaallit Nunaat avammut anginerusumik nittarsaaneqarnera eqqartorneqarnissaalu anguniarparput, Mads Daniel Skifte taama oqarpoq.