Takornariat qassiunersut misissornialerpaat

Mittarfeqarfiit nittartagaanni tamanna atuarneqarsinnaavoq.

Nunani allaninngaanneersut Kalaallit Nunaannut angalagaangata allattorneqartalissapput, Mittarfeqarfiit, Visit Greenland, Namminersorlutik Oqartussat Kalaallit Nunaannilu Naatsorsueqqissaartarfik suleqatigiillutik misissuisuussallutik.

Paasissutissat takornarianut, siunissaq eqqarsaatigalugu, ussassaarutinut atorneqarnissaat eqqarsaataavoq, Nunatsinnilu angalasut kikkuugaluarpataluunniit nalunaarsorneqartalissapput, nalunaarsuinerlu pisariunavianngitsoq Mittarfeqarfiit allapput:

- Securitymi sulisut nunani allaninngaanniit angalasut tamarmik aperisassavaat nunami sumi najugaqarneri, skanneriararlu atorlugu akissut allattorneqartassalluni. Taamaalioreernikkut paasissutissat katersorneqarneqareerlutik paasissutissat naatsorsueqqissaartarfimmut ingerlateqqinneqartassapput, Mittarfeqarfinni attaveqaqatigiinnermi aqutsisoq, Hans Henrik Lichtenberg, oqarpoq.

Takornariat suminngaanneernersut annerusumik ullumi ilisimaneqanngilaq, periuserlu nutaaq Visit Greenlandip nuannaarutigaa:

- Takornariaqarnikkut ussassaarilluni sunniiniarnermut anguniakkagut, allatorujussuaq toraagarsinnaanngussavagut. Paasissutissat katersorneqareerpata, angalasarnikkut allannguutit qimerloorsinnaanngussavagut iliuuseqarfigisinnaanngorlutigit. Iliuutsip torraqutigaa, immikkoortissinnaanngussagatsigit Kalaallit Nunaanni Qallunaat Nunaannilu najugallit, nunatsinni angalasarneri qassiunersut, Visit Greenlandip pisortaata tulliata Anders la Cour Vahlip oqaatigaa.