Takornariat amerleriarujussuartut

2025-mi takornarialerineq ulapaarfiuvoq.

Umiarsuarnik takornariartaatinik tikeraartut 2024-mut sanilliullugu katillugit 32.000-inik amerlanerupput, timmisartunullu ilaasut nunanit allaneersut 17.000-init amerlanerullutik.

Tamanna Kalaallit Nunaanni Naatsorsueqqissaartarfiup kisitsisaataannit paasinarsivoq.

Visit Greenlandip nunatsinni takornariartitsisartunut ukiup pitsaasuunera ukioq manna siusinnerusukkut nalunaarutigaa. 

- Takornariartitsisut amerlanersaasa 2025-mi takornariartitsinerup pitsaasutut imaluunniit pitsaalluinnartutut oqaatigisarpaat aaqqissuussaat tamakkiisumik peqataaffigineqartarlutik, piumasut amerliartorlutik aamma nunanit tamalaaneersunik tikeraartorpassuaqarnera pissutigalugit, misissuinerminni allapput.

Illoqarfiilli allat takornariartitsinermik 2025-mi siuarsaaqataalerput, Ilulissanilu umiarsuarnik takornariartaatinik tikeraartut ikilisimapput.

Paamiuni amerleriarujussuartut

Umiarsuarnik takornariartaatinik 2025-mi angalasut katillugit 213.674-it Kalaallit Nunaanni illoqarfinnut tikeraarput.

Illoqarfiit tikeraarneqarnerpaat marluk tassaapput Qaqortoq aamma Nuuk, 46.000-inik aamma 44.000-inik tikeraarfigineqartut. Paamiut takornariarneqarnerpaat pingajuattut tupaallannartumik inissippoq.

Umiarsuarnik takornariartaatinut ilaallutik 2024-mi tikittut 5.000-t sinnilaarlugit amerlassuseqaraluartut, 2025-mi arfinileriaammik amerlisimapput 30.000-ngajanngorlutik.

Visit Greenlandillumi Semersuup Kitaa ’ukioq manna aasaanerani takornariartitsinermi ulapaarfiunerpaat ilaattut’ inissisimasutut ukioq manna misissuinermini inerniliuppaat.

Paamiuni innuttaasut avataanit tikeraarpassuarnit akornusersorneqartarlutik misigisimapput, tassanilu kangerlunni aalisarneq umiarsuarnik angisuunik sumiiffinnut eqqissisimatinneqartunut ingerlaartoqartarnera KNR-ip siusinnerusukkut allaaseraa.

Kommuneqarfik Sermersuumi borgmesteri, Avaaraq Olsen, ukiutoqqami oqalugiaammini takornariaqarnerup ‘innuttaasut pisariaqartitaat aallaavigalugit’ ineriartortinneqarnissaa oqaatigaa. 

- Taamaattumik sumiiffinni takornariarfiusinnaasut killilersorniarlugit aalajangerpugut, takornariaqarneq pinngortitaq inuiaqatigiillu artukkernagit akisussaassuseqartumik ineriartortitsinneqarniassammat. Sumiiffiit taakkua erseqqissumik nalunaarsorneqassapput, borgmesteri oqalugiarnermini oqarpoq. 

Ilulissani ikileriartut

Ilulissanili umiarsuarnik takornariartaatinut ilaallutik Ilulissiartut ikileriarujussuarput. 2024-mi takornariartut 14.000-iusimallutik 2025-mi 10.000-it missaanniilerput.

Umiarsuarnik takornariartaatinik takornariaqarnerup iluanaarutaasa illoqarfimmut tunniunneqartannginnerannik ukioq kingulleq isornartorsiuinerit arlallit tamatumunnga sunniuteqarput. Tamanna Ilulissani akerliussutsimik takutitsisoqarneranik ilaatigut kinguneqarpoq, tamannalu taamanikkut naalakkersuisuusumit Naaja H. Nathanielsenimit (IA) isorineqarpoq.

- Takornarialerineq inuussutissarsiutitut uagutsinnut pingaaruteqarpoq, suleqatigiillutalu ineriartortitsissavarput - isumaqatigiinngifeqaraluaruttaluunniit. Immitsinnut nunatsinnullu tikeraartunut iluamik pissuseqassaagut, Naaja H. Nathanielsen (IA) KNR-imut aasaq oqarpoq.

Demokraatit takornariartitsinermit aningaasat nunamiiginnarnissaat qanoq qulakkeerneqarsinnaaneranut tunngatillugu apeqquteqaataat Inatsisartuni juunimi sammineqassaaq.

Takornariaqarnerlulernera ilutigalugu unnuisarfiit inniminnerneqarsinnaasuniittarnerat Naatsorsueqqissaartarfiup kisitsisaataannit paasinarsivoq.

Init  2025-mi attartorneqartut katillugit 296.000-t sinnerlugit amerlassuseqarput, ukiup siulianut sanilliullugu 27.000-nik amerlanerullutik.