Takornariartitsisut ernumaammersimaarput

- Umiarsuit takornariartaatit ingiaqatigiillutik angalasalernissaanut malerittarisassiortoqassappat, umiarsuarnik takornariartitsinerup ajalusoortinneqarnissaa annilaanngatigilluinnarparput, Anders Stenbakken oqarpoq.

Umiartornermut tunngassunut nunat tamaalaat kattuffissuanni, IMO-mi, ilasortat ippassaq ataatsimiipput. Tassanilu Danmarkip Imarsiornermut Qullersaqarfiata Nunatsinni issittullu sinnerani isumannaannerusumik angallattoqalernissaa siunertaralugu siunnersuuteqarpoq, umiarsuit takornariartaatit minnerpaamik marlukkaarlutik ingerlaqatigiittarnissaat maleruagassanut nutaanut ilanngunneqassasoq.

Tamannalu Nunatsinni takornariartitsiviup Visit Greenlandip pisortaata Anders Stenbakkenip annilaanganartoqartippaa:

- Isumassarsiaq ajorluinnartuusoq isumaqarpugut. Tassami umiarsuaatileqatigiit imminnut unammisut piumaffiginiarneqarput aaqqissuusseqatigiillutik angalaqatigiittassasut, sumiiffinnut assigiinnukartassasut tamassumalu kingunerissavaa takornariartitsinermut neqeroorutaasut assigiiaaginnalernerat, Anders Stenbakken taama naliliivoq.

Taassumalu tikkuarpaa, takornarianik issittup imartaani angallassinermut sakkortuunik maanna maleruagassaqareermat. Aammali suli sukaterisoqaqqinniassappat takoqarnariartitsinermik suliaqartut peqataarusuttut erseqqissarpaa.

Assersuutigalugu angallanneq ingerlaqatigiinngikkaluarluni allatulli iliuuseqarnikkut isumannaannerulersinneqarsinnaasoq. Assersuutigaalu Nunatta imartaa pingasunut killeqarfilersorneqarsinnaasoq immikkoortoqarfilersorlugu. Immikkoortoq siulleq Nanortalimmiit Ilulissanut, aappaallu Uummannaamiit Upernavimmut pingajoralugu Avanersuaq Tunu ilanngullugu.

- Takorloorneqarsinnaavoq Kalaallit Nunaata imartaa immikkoortortalersorlugu killilersorneqarsinnaasoq, immikkoortortaqarfillu amerlanerutikkaanni isumannaallisaanermut umiarsuarnut piumasaqaatit sakkortunerutinneqarsinnaapput umiarsuarnilu inuttat Nunatta imartaanut ilisimasaqarnerulernerisigut, Visit Greenlandimi pisortaq Anders Stenbakken oqarpoq.

Issittumi umiartornermi maleruagassat kingusinnerpaamik ukiut marluk qaangiuppata atuutilissapput. Kisianni piumasaqaatit Danmarkip kissaatigisaatut sukaterneqassanersut suli ilisimaneqanngilaq.