Takornariartaatit sillimaniarnermut maleruagassat malippaat

Sakkutuut naalagaata takornariartaatinut Kalaallit Nunaata sineriaani angallassisartunut sillimaniaqqusilluni Aviisimut Politikenimut oqaaseqarnera illuatungilerneqarpoq.

- Imaani angallannermi maleruaqqusat amerlapput, soorlu aqqutit suut ingerlaarfigineqassanersut, aqqutit aalajangersimasut pillugit maleruaqqusat kiisalu aqqutit suut uuttortarneqarsimanersut pillugit ilisimasassat aamma iluliarsuit qanoq qanitsigalugit ingerlaartoqarsinnaanersoq pillugu maleruagassaqareerpoq, taamaattumik iluliarsuit qanillattorlugit takornariartaaterput ingerlaarneq ajorpoq, Ida Winther oqarpoq.

Hurtigeruten Greenland, takornariartaammik Framimik piginnittuusoq, ilaasuminik ilulissanik takornariartitserusukkaagat, angallassisartunik attartortarpoq. Sillimaniarnerlu eqqarsaatigalugu mianersortarput, tassa Ilulissat avannaatungaani Eqip sermianut takornariartoqassagaangat, Fram qanillinaveersaartarpoq.

- Sermimit kilometerit qulit avasitsigisumiittarpugut, maleruaqqusallu aallavigalugit angallassisarpugut, Hurtigruten Greenlandimi Destination Manageri, Ida Winther oqarpoq.

Umiarsuit takornariartaassuit ajunaalissagaluarpata imminnut ikioqatigiissinnaaniassammata takornariartaatit marlukkaartillugit angallassisarnissaannut pillugu sakkutuut naalagaat siunnersuuteqarpoq.

- Marlukkaarlutik angalaqatigiittarnissaat orniginanngilaq, tassa unnammilleqatigiinneq tunngavigalugu aamma tikiffissat takornarianik ulikkaartuunnginniassammata, Ida Winther oqarpoq.