Takornariartaatit ataqatigiissaarnerulernissaat kissaatigaat
Tamannalumi sakkutuut imarsiortuut naalagaata Henrik Kudskip, Kangilinnguani sakkutooqarfimmi pisortaasup ukiuni arlaqalersuni kissaatigisimavaa.
- Aasaanerani sikuusarnera 2008-mili annikilliartorsimavoq, tamannalumi ornitassat alutornartorsuit tikinniarlugit umiarsuarnit takornariartaatinit atorneqarluartarpoq. Ajornartorsiutaavorli soqanngitsorsuarmi angalatilluni, umiussagaluaraanni ikkarlissagaluaraanniluunnit imaluunnit allatut ajutoortoqassagaluarpat ikiorneqariasaarnissaq pisinnaanngimmat ikiorsiisussammi ungaseqimmata. Naak Pituffimmi aamma Nunap eqqissisimatitap avataani umiarsuaqaraluartoq, ajutoortumut ornigunnissaq ullut marluk tikillugit sivisussuseqarsinnaavoq.
Taamaattumik Henrik Kudsk isumaqarpoq, takornariartaatit marlukkaarlutik angalasariaqartut.
- Oqanngilanga umiarsuit ingerlaqatigiillutik ingerlaassasut imaluunnit ataatsikkut kangerlummut angalassasut, imartamili kisimi angalaarnissat pinaveersaartariaqarpoq. Imaassinnaavoq umiarsuaq takornariartaat alla avannaarsuanut angalaarniartoq, aappaalu ajutuussagaluarpat ataqatiiissaarinikkut imminnut ikoqatigiissinnaapput.
Nunat tamalaat imarsiornikkut suleqatigiiffiat, IMO, Issittumi angalasarneq pillugu malittarisassanik Polarkodemik taaneqartumik suliaqarluni naammassilerpoq, Henrik Kudskillu oqarnera naapertorlugu nunat Naalagaaffinnut Peqatigiinnut ilaasortaasut allat umiarsuarnut takornariartaatinut sakkortuumik kaammattuipput angalasarnitik ataqatigiissaartaqqullugit. Periusissaq Polarkoden 2013-imi 2014-imiluunniit atuutilissagatinneqarpoq.
Malik Milfeldtip, Nunatsinni Takornariaqarnermi Inuussutissarsiornermilu Siunnersuisoqatigiinneersup, oqarnera naapertorlugu, umiarsuit takornariartaatit angalasarnissatik ataqatigiissartalernissaat piviusorsiortuunnginnerarpaa. Taamaattorli isumaqarpoq ajornartorsiutaasariaqanngitsoq, tassa umiarsuit avannaarsuani kangiatalu avannaani angalasartut, ilisimasassarsiortunit umiarsuarineqakkajummata issittumi angalanissaminnut naleqqussarsimasut. Ilanngulluguttaaq naqissuserpaa, umiarsuaatileqatigiit sillimaniarnikkut piareersimanissap qaffasinnerpaaffimminiinnissaa namminneq soqutigisarigaat, taamaattorli aamma Henrik Kudskip oqaatigaa umiarsuit takornariartaatit amerlanersaat akisussaassuseqartuusut.
- Umiarsuaatileqatigiit amerlanersaat silatusaartumik pissusilersortarput. Issittumiliuna malittarisassanik umiarsuarnit malinneqartussanit suliaqarnitsinnut pissutaasoq tassaavoq taakku silatusaarniassammata.
Henrik Kudskip oqarnera naapertorlugu Issittup ukiuni kingullerni sisamani aasaanerani affaannarmik sikuusalersimanera pissutaavoq, Kangilinnguani sakkutooqarfiup akisussaaffimmik inissiiniarsarinera.
