Takornariartaatinut annaassiniarnissamut suli pikkorissartoqanngilaq

Imaanilu sillimaniarneq eqqarsaatigalugu sinerissami nakkutilliisut unammisassaqarput.

- Ilaasartaatit tusindinik ilaasullit annaassiniarfiginissaanut suli sungiusartoqanngilaq, sinerissami nakkutilliisuni aallartitat ittuat Jan Bøgsted oqarpoq, taanna Nuummi silap pinngortitallu allanngoriartoneri pillugit ataatsimeersuartoqarnerani imaani sillimaniarneq pillugu oqalugiarpoq.

Kalaallit Nunaat pillugu soqutiginninneq ukiuni kingullerni annertusiartuinnarpoq, tassungalu atatillugu takornariutit ilaasartaatit angisuut tikittartut kiisalu umiarsuit immap naqqani uuliasiornermi atorneqartartut amerliartuinnarput, aallatitat ittuat Jan Bøgsted oqarpoq. Sinerissami nakkutilliisoqarfimmit umiarsuit sinerissamiittut nakkutigeqqissaarnissaat soqutigisarineqarpoq, tassami ajutooratarsinnaasut sumiinneri ilisimanissaat imaatigut sillimaniarneq eqqarsaatigalugu pingaartinneqarpoq. Silap pinngortitallu allanngoriartorneri pillugit Nuummi ataatsimeersuartoqarnerani Jan Bøgsted oqalugiartunut ilaavoq. Sikup sermillu aakkiartornera ilutigalugu ilaasartaatinut ilaallutik takornariat amerliartorput, taakkuuppullu imaatigut sillimaniarneq eqqarsaatigalugu eqqumaffiginiagassat.

- Imaatigut annaassiniaratarsinnaaneq eqqarsaatigalugu annanniutit pigineqarnissaat pingaaruteqarpoq, atortorissaarutillu ullut unnuillu marluk atasinnaassapput, tassami ilaasartaatit 4.000 tungaanut ilaasullit tikittalernikuupput. Annaassiniarnermilu suliassat amerlaqaat, tamakkulu politiit peqqinnissaqarfiillu suleqatiginerisigut suliarineqartussaassapput, Jan Bøgsted oqarpoq. Kalaallit Nunaata sineriaani umiarsuarnut kiisalu angallatinut 50-it tungaanut ilaasoqarsinnaasunut annaassiniarnissamut pilersaaruteqartoqarpoq sungiusartoqartarlunilu, ilaasartaatinulli 500-inut kiisalu 1000-it sinnerlugit ilaasulinnut annaassiniarsinnaanermut suli pikkorissartoqanngilaq.

- ilaasartaammik 500-inik ilaasulimmik annaassinniartoqalissappat, taava umiarsuit sinerissami nakkutilliisutut atorneqartut tamarmik atorneqartariaqassapput kiisalu angallatit aalisariutaasartut atorneqartariaqassallutik. Taakkualu ataqatigiissaarinikkut ilaasunik sumut oqqussuissanersut eqqarsaatigineqartariaqartoq, annaassiniarnermilu ilaasartaammut ilaasut tamarmik nassaarineqarnersut paasiniarneqartariaqarpoq. Ilaasunullu 1000-inut amerlatigisunut annaassiniarnissamut suli sungiusartoqanngilaq, amerlavallaaqaat, aallartitat ittuat Jan Bøgsted oqarpoq.Ilaasartaatit marlukkaarlutik sinerissami angalasarnissaat sinerissami nakkutilliisoqarfimmit siunnersuutigineqarumavoq, ilaasartaammik angisuumik annaassiniarluarsinnaasut tassaammata ilaasartaatit angisuut