Nunatsinni takornariaqarnerup ineriartornera unittoq
Visit Greenlandili naapertorlugu nunanit allaneersut nunatsinnut takornariartartut ukiuni arlaqalersuni pitsaasumik amerliartornerat unippoq.
Visit Greenlandillu erseqqissaatigaa, nunanit allaneersut nunatsinnut timmisartorlutik takornariartartut 3,1 procentinik ikileriarsimasut.
- Misilittakkavut naapertorlugit ukiup sisamararterutaasa pingajuanni piffissaq tassaavoq takornariat Kalaallit Nunaannut tikittartut affaasa tikittarfiat, taamaasilluni ukiup sisamararterutaani tassani ineriartorneq ukiup ingerlanerani
takornariaqarnerup ineriartorneranut aalajangiisuusorujussuusarpoq, Visit Greenland tusagassiutinut taama nalunaaruteqarpoq nangillunilu:
- Takornariaqarneq 2014-imili pitsaasumik ineriartorpoq, ukiumut qaffariaatit 3%-it 10%-llu akornanniimmata, tamannali maanna unipppoq.
AAMMA ATUARUK Siunissami takornariartitsineq pillugu isumasioqatigiilersut
Nunanit allanit Islandimut timmisartorlutik angalasut Keflavikip mittarfiatigoortut piffissami tassani 14,4%-imik ikileriarsimanerat takornariaqarnerup ineriartornerata uninneranut nassuiaataasinnaasut ilagaat.
Visit Greenlandip peqqutaasorigineragaa alla tassaavoq, inniminniisinnaasut ikilerannik kinguneqaratarsimasinnaasumik Ilulissani juunimiit septemberi ilanngullugu unnuiffissat tamarmik ukiuni kingullerni ilaatigut ukioq ataaseq sioqqullugu inniminnerneqarsimasarnerat.
- Ilulissat ilisimaneqarluartoq Kalaallit Nunaanni takornariarfiunerpaasarpoq, takornariallu Kalaallit Nunaanni sumiiffinnut allanut angalanerunissaannut piffissaq sivisooq atorlugu kajumissaarneqartariaqarput, Visit Greenland allappoq.
Visit Greenlandip ilisimatitsissutigaa, nunatta sinnerani takornariarfiusinnaasut allat ilisimaneqalerulernissaa ukiuni aggersuni sulissutigineqassasoq.