Takornariaqarnerulernera isumallualersitsivoq
Igalikumi unnuisut siornamut sanilliullugit 500-nik amerleriarsimapput, tassa procentinngorlugu 25 procentinik amerlillutik.
Aamma Hotel Narsami Hotel Qaqortumilu unnuisut siorna taamaalineranut saniullugu amerleriarput.
Taamatuttaaq umiarsuit takornariartaatit Kujataanut pisartut amerleriarsimallutik.
Takornariaqartitsinerup iluani siuariartoqaraluartoq suli angallannerup tungaatigut akimmisaarfissaqarpoq.
- Timmisartukkut angalaniarnerup Nanortalimmut takornarissat amerlanerusut tikittarnissaraluat akimmisaartittrapaa. Allaat takornariat aqqutissaaleqinermik peqquteqartumik uniinnartariaqartarlutik. Taamaattumik angallannikkut aqqutit pitsanngorsaavigineqarnissaat neriuutigaarput, taamaalilluni Nanortalimmut takornariartartut amerleriarniassammata, Niels Tækker, Nanortalik Tourism Servicemi pisortaq oqarpoq.
Takornarissat angalatitseqatigiiffiit aqqutiginagit, namminnerli angalanissartik aaqqissorlugu tikittalernerat sumiiffiit allat assigalugit kujataani aamma maluginiarneqarpoq.
- Angalaqatigiittunuinnaanngitsoq, aammali namminneerlutik angalanissaminnut aaqqissuisunut Air Greenlandip aappaagu akikillisaanera nuannaaruutigaarput, Jacky Simoud Blue Ice Explorerimeersoq oqarpoq.
