Takornariaqarneq siuarsarneqassappat billittit akikinnerulertariaqarput
Aamma Demokraatit siulittaasuata tulliata, Randi Vestergaard Evaldsenip qineqqusaarummini tamanna neqitsiuppaa oqarluni, timmisartornermi billittit akikinnerulertariaqartut.
- Nunatta aningaasarsiorneranut takornariaqarneq isaatitsivigineqarnerulersinneqassaaq angallanikkut akit akikillippata, tassalu taamaalilluta takornariaqarneq pitsaanerusumik aallutilissallutigu.
AAMMA ATUARUK Qaqortup mittarfittaarnissaa qanilleqqippoq
Randi Vestergaard Evaldsenip taama siunnersuuteqarnermini eqqarsaatigaa, timmisartornermi akit appartinneqarnerisigut, Nunatsinnut takornariarusuttut Islandimut takornariartartut amerlassusaattut ilisinneqarluarsinnaasut.
Billittit akikinnerulersinneqarsinnaapput mittarfiliassatut pilersaarutit taamaasinneqarnerisigut, Randi Vestergaard Evaldsen oqarpoq imalu nangilluni.
- Nunatsinni illoqarfiit ilaanni mittarfiliortoqassasoq siunertaavoq. Taamaaliornermili tamanna imminut suli akilersinnaanngilaq. Taamaattumik siunnersuutigaara, mittarfiliorniarnernut aningaasaliissutigineqarsimasut takornariaqarnerup siuarsarnissaanut atorneqartariaqartut, taamaaliornikkullu timmisartumut ilaanermut billittit akikinnerulersinneqarsinnaallutik.
Demokraatit siulittaasuata tulliata, Randi Vestergaard Evaldsenip taama siunnersuuteqarnermini, Parti Naleqqap siuliutittaasua, Hans Enoksen isumaqatigaa, taassuma Qaqortumi mittarfittaartoqarnissaata taamaatinneqarnissaa siunnersuutigaa oqarluni, suliffissaaleqineq inissaaleqinerlu salliutinneqartariaqartut timmisartoqarfiliornissaq taamaatillugu.
Aamma atuaruk Qaqortumi mittarfiliornissaq uninngavoq
Demokraatit siulittaasorisimasaata, Jens B. Frederiksenip Qaqortumi Tasiilamilu mittarfittaarnissat oqallisaalerneranni isumaqataavoq, oqartariaqarporlu Demokraatit isumaat tamanna pillugu maanna allanngorsimasut.
