Politikki

Qaqortumi mittarfiliornissaq uninngavoq

Inatsisartunut qinersisoqartussanngornera pillugu Naalakkersuisut suliassatut pilersaarutigisimasaasa ilaat nalorninartoqalerput. Suliniutit taakku ilagaat Qaqortumi mittarfittaarnissaq, politikerinit aallartinneqarsimasoq, Inatsisartunilli suli aningaasaliffigineqanngitsoq.

Allattoq Sara K. Jakobsen, Tikaajaat kristensen

oktobarip 17-at 2014 17:58

Kim Kielsenip Naalakkersuisuugallartui nutaanik aallartitsisinnaanngillat. Inatsit taamaappoq. Taamaakkaluartoq nutaanik aallartitsisoqaqqammersoq qinersinissaq nalunaarutigineqarpoq.

Kujataanilu qillerutit assaatillu atortullu allat suli uninngasussanngorput.

- Upernaap ingerlanerani misissuisoqarsimavoq, politikerit paasissutissanik tunngaveqarlutik Qaqortumi mittarfiliortoqassanersoq aalajangiiffiginiassammassuk. Pilersaarutaasimavorlu ukiaanerani ataatsimiinnermi aalajangiisoqassasoq, attaveqarnermut naalakkersuisoqarfimmi pisortaanerugallartoq, Julie Præst Wiche, KNR-imut oqarpoq.

Aamma atuaruk Politikerit: Qaqortumi mittarfik ineriartortitsissaaq

Siumut Atassutillu Naalakkersuisooqatigiit ukiup tulliani aningaasanut inatsisissamut siunnersuutigisimavaat mittarfiliornissamut 371 millionit koruunit immikkoortinneqassasut. Qaqortumili mittarfiliortoqassanersoq Inatsisartunngortussat aalajangerumaarpaat.

Inatsisartunut qinersisoqareerpat Inatsisartut suliassaasa siulliit ilagaat 2015-imut aningaasanut inatsisiliornissat, pissanganarporlu taamanikkussamut suli Qaqortumi mittarfiliortoqarnissaanut amerlanerussuteqartoqassanersoq.

Aamma atuaruk Qaqortup mittarfittaarnissaa qanilleqqippoq

- Mittarfiliortoqalinngilaq suli, akuersissummik peqaqqaarluni aallartittoqarsinnaavoq, Inatsisartullu ataatsimiinneranni aatsaat akuersissummik tunniussisoqarsinnaavoq, Julie Præst Wilche oqarpoq.

Naalakkersuisuusimasut, Aleqa Hammondimit siulersorneqartut, aappaagu aningaasanut inatsisissamut siunnersuutiminni inissialiornissamut aningaasaliissutit ukiut sisamat ingerlaneranni 400 millionit koruuninik annikillineqassasut siunnersuutigisimavaat.

Inissialiornerup unikaallatsinneqarneranit Qaqortumi mittarfiliornissaq aningaasalersorneqassalluni.

Nutaarsiassami kukkunermik nassaarsimaguit uunga allaffigineqarsinnaavugut.