Amerikamiut taamatut inerisaanissatsinnut soqutiginnimmata nuannaarutigivara, Palle Jerimiassen oqarpoq.Assi: KNR

Takornarialerisut 20-t USA-mukassasut

Nuna tamakkerlugu takornariaqarnermik suliallit aappaagu pikkorissariassapput. Avannaata Kommunia amerikamiut Danmarkimi aallartitaqarfiannut taama isumaqatigiissuteqarpoq. Angalaneq amerikamiut akilissavaat.

Avannaata Kommuniani borgmesterip, attaviitsup, Palle Jerimiassenip, amerikamiut Danmarkimi aallartitaqarfiat tikeraarlugu isumaqatigiissusiorfigeqqammerpaa.

- Takornariaqarnikkut inerisaanermut peqataarusupput, aamma neqeroorutigivaat takornariaqarnermi sullissisut inuit 20-it aappaagu amerikaliarsinnaasut, tassanilu takornariat tikinneraniit qanoq sullinneqarnerannik ilinniartinneqassapput, Palle Jerimiassen oqarpoq.

Nuna tamakkerlugu takornarialerisut peqataasinnaapput, kommunimiillu atorfilittanik peqataasoqarnissaa borgmesterip qularinngilaa.

Nunarput aningaasartuuteqassanngitsoq

Nunatsinninneersut angalanissaat tamaat amerikamiut akilissavaat.

- Taanna angalaneq amerikap aningaasatigut tapiissutitut uatsinnut tunniunniarlugu oqariartuutigivaa. Taamaattumik tassuunakkut takornariaqarnikkut inerisaanissamut tiguussaasumik massakkut isumaqatigiissuteqarpugut, Palle Jerimiassen oqarpoq.

Isumaqatigiissuteqarnerlu Avannaata Kommuniani takornariaqarnerup aningaasarsiutaanerata inerisarneqarnissaanut iluaqutaasussatut isigalugu nuannaarutaavoq.

Novembarimi angalasoqassasoq

- Uagut kommunitut pingaartitarivarput takornariaqarnerup aningaasarsiornermi sukatut inissinneqarnissaa. Aamma nunaqavissut annertunerusumik peqataatinnissaat. Taamaattumik aqqutit tamakkua tamaasa atorluarusuppagut, aamma nuannaarutigivara amerikamiut taamatut inerisaanissatsinnut soqutiginnimmata, Palle Jerimiassen oqarpoq.

Novembarimi takornariariaqannginnerpaasarmat, angalanerup aappaagu novembarimi pinissaa kommunip naatsorsuutigaa. Peqataarusuttut tuluttut oqalussinnaanissaat piumasaqaataanngilaq.

Peqataarusuttut qinnuteqassapput, qinnuteqaatillu nalilersorneqarumaarput. Qinnuteqarneq nittartakkakkut pissasoq kommuni nalunaarpoq, qaquguli qinnuteqartoqarsinnaanngornissaa suli ilisimaneqanngilaq.

Kommunip amerikamiullu aallartitaqarfiata suleqatigiilernerat amerikamiut Ilulissanut septembarip 17-ani tikeraarneranni aallartittoq, borgmesteri oqarpoq. Amerikamiut neqeroornerminni kommunimut piumasaqaateqanngillat.

Kommunip amerikamiullu aallartitaqarfiata suleqatigiilernerat amerikamiut Ilulissanut septembarip 17-ani tikeraarneranni aallartittoq, borgmesteri oqarpoq. Amerikamiut neqeroornerminni kommunimut piumasaqaateqanngillat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat