Takornarialerinini akisunaavissorpaa

Ove Villadsenip, Ilimanameersup, maannakkut nassuerutigiinnartariaqalerpaa aalisarani nunaqarfimmini takornarianut aallussinini kukkunerusuusoq. Aalisariumminummi million pallillugit akiitsoqarpoq, akilersorniarluguli aningaasarsiorfissaqanngilaq ukioq mannamut qaleralittassani nungukatareersimagamigit.

Ove Villadsen nunaqarfimmini takornarialerilluni ukiuni kingullerni outfitteriusarpoq. Tamannalu pimoorullugu aallunniaraanni piffissartornartorujusuussarpoq, soorlu Ove taamaaliortartoq.

- Ilisimasuugukku qaleralinniarnissamut akuersissutaatillit ukiuni kingullerni pingasuni pisaat agguatigiisillugit pisassiisoqartussaasoq, tassaqaana takornarilerisimassagaluarpunga, Ove Villadsen, Fåborg 32-mik aalisariutaatilik, ukiut 25-it matuma siorna 1,7 million koruunilerlugu pisisimasoq oqarpoq.

- Aalisariummut maannakkut 800.000 koruunit akiitsoraakka, Ove Villadsen oqarpoq. Maannakkullu oqaatigisinnaannginnerarpaa akiitsuni qanoq taarsersussanerlugit.

Apriilip qiteqqunnerani allagarsivoq 29.800 kiilunik ukioq mannamut pisassinneqarsimalluni.

- Pisassiissutigineqartut amerlanersaat piffissap tamatuma nalaani aalisareersimavakka, qaammallu taanna naanngitsoq nungullugit aalisarpakka, Ove Villadsen erseqqissaavoq, allanik maannakkut suliassaqanginnini pissutigalugu nunaqarfimmini aqqusinernik sanertuusoq.

Ove Villadsen isumaqarpoq qanitukkut aalisalernissani naatsorsuutigisinnaanagu.

- Oqartoqarpoq napparsimalluni imaluunnit motoriartoorsimalluni ukiut siuliini aalisarsinnaasimanngitsut naammagittaalliuutaat tusaaniarneqartartut tapersersorneqartarlutillu. Uangalu taakkuninnga nalaataqarsimannginnama ukiuni qaninnerpaani akilersinnaasumik aalisalersinnaanera naatsorsuutigisinnaanavianngilara, Ove Villadsen erseqqissaavoq.

Pisassiissutit pillugit naammagittaalliortoqarsinnaavoq taamaattoq tamanna Ove Villadsenimut iluaqutaasinnaarpasinngilaq.

- Pisassiissutinik amerlanerusunik pisimannginnerit taamaallaat naammagittaalliutigisinnaavat, naatsorsuutigisinnaanngilammi ukioq mannamut pisassiissutinik amerlanernik pisinnaanissat. Taama Ove Villadsen imminerminut pisassiissutigineqartut nungullugit aalisareersimallugit amerlanernik pisassaqinneqarusulluni pisortanut saaffiginnikkami ilisimatinneqarpoq. Imminerminummi ukioq mannamut pisassiissutigineqartut 29.800 kiilut apriilimili aalisarlugit nungoreerpai.