Takanna saqqummersinneqaqqippoq
Iganermut najoqqutassiat atuakkamiittut Tupaarnaq Rosing Olsenimit katersorneqarsimapput, atuakkallu assiliartai kusanarluinnartut Nina Spore Kreutzmannimit suliaallutik. Atuagaq torrallataalluinnartoq Kalaallit nerisassaataannik iganermi najoqqutassaalluartoq iggavinni pinngitsoorneqarsinnaanngilaq.
-Atuagaq pisiarineqarluarsimavoq, maannalu saqqummerseqipparput. Atuagaq iganermut najoqqutassanik arlalinnik imaqartoq, Kalaallit nerisassaataannik naasuinillu iganermut najoqqutassaavoq. Assersuutigineqarsinnaavoq puisip neqaa. Puisip neqaa naliginnaasumik uuginnarneqartarpoq, suppaliarineqarluniluunniit, uanili atuakkami puisip neqaa allatut suliaralugu sassaalliutigineqarsinnaaneranut najoqqutassaqarpoq, Lene Therkelsen oqaluttuarpoq.
Takanna tuluttut oqaasertalersugaalluni saqqummersinneqartoq takornarianut nunatsinni tikeraarnerminni kalaallit nerisassaataannik misilitaqarsimasunut tulluussagaavoq. Kiisalu Danskisut Kalaallisullu oqaasertalersugaq nunaqavissunut, danskinullu nunatsinni najugaqartunut kalaallit nerisassaataannik suliaqarnermi isumassarsiassanik amigaateqartunut tulluartuulluni.
-Neriuutigaarput takornariarpassuit nunatsinnut tikittartut atuakkamik nassarlutik angerlartarumaartut. Taamaalillutimmi Kalaallit nerisassaataannik naammattuuissagaluarunik atuakkammi najoqqutassat pigeriissagamikkit. Atuagarli aamma inuusuttunut angerlarsimaffik qimallugu najugaqalersimasunut atussallugu tulluartuvoq. Anaanammi igaavinik neriunnaarnemi, atuakkami najoqqutassiat ersarilluinnartut atorlugit iganissaminni atorluarsinnaavaat, Lene Therkelsen naqiterivik Milik-meersoq taama oqarpoq.
