Taj Mahal takornarniarneqaqqissinnaalertoq

Takornariat Indiami ornigarluartagaat, Taj Mahal, coronap ajornartoortitsinerani qaammatialunni matoqqatinneqareerluni ataasinngornermi ammaqqippoq.

Nutaarsiassaqartitsivik AFP taama allappoq.

Taj Mahal illoqarfimmi Agrami inissisimavoq, Indiamullu takornarianit ornigarneqarpaalluni. Taj Mahalip ammaqqinneqarneratigut Indiami inuunerup nalinginnaasunngoqqinnera takutinniarneqartoq, AFP allappoq, takornariartitsisarnerup siuarsarneqarnissaa, Indiamilu aningaasarsiornerup nalinginnaasumik ingerlaqqilernissaa takutinniarneqarluni.

Taj Mahal, coronavirusip tuniluutilernera pakkersimaarniarlugu nunap sinnera ilanngullugu ukioq manna marsimi matuneqarpoq.

AAMMA ATUARUK Isfjord får bronzemedalje

Indiami innuttaasut 1,3 milliardit akornannni 5,4 millioninit amerlanerusut coronavirusimik maannamut tunillanneqarsimapput.

Coronavirusilu Indiami suli tuniluuttorujussuuvoq, inuimmi 1000-t missaat coronavirusimik tunillanneqarsimasut ullormut paasineqartarmata, nappaammillu toqquteqartut ullormut 1000-t sinnertarlugit.

Taamaammat takornariat assersuutigalugu Taj Mahalimik takuniaasut aamma killilersuiffigineqarput.

Inuit amerlanerpaamik 5000-t Taj Mahalimik ullormut takuniaasinnaatitaassapput. Inuit Taj Mahalimik ullormut takuniaasut agguaqatigiissillugu 20.000-t missaanniittaraluarput. Taj Mahalimi inunnit 7 millioninit ukiup ataatsip ingerlanerani takuniarneqartarpoq.