Ilisimatooq: Taiwanimut tikeraarneq avammut nioqquteqarnermut akornutaasimassagaluarpoq
Taamaammat naalakkersuisup Taiwanimut tikeraarnera Kinamut nioqquteqarnermik 2015-imi 600 millionit koruuninik naleqartumut sanngiillisitsisinnaavoq, Københavnip Universitetiani ilisimatusartoq taama naliliivoq.
- Kinamiut niuernikkut isumaqatigiissutinut allatigullu isumaqatigiissutinut tunngatillugu pillaanissartik tunuarsimaarfigineq-ajorpaat, Camilla T. N. Sørensen, Københavnip Universitetiata naalagaaffiit pissusiinik ilisimatusarfiani adjunkti KNR-imut taama oqarpoq.
Taiwanimi illoqarfiit pingaarnersaanni Taipeimi inuussutissarsiornikkut nittarsaassineq Greenland Day Vittus Qujaukitsup siorna novembarip aallaqqaataani ammartussaagaluarpaa.
Kinamit alaatsinaanneqartoq
Nunarput nunat tamalaat akornanni sunniuteqarpallaanngikkaluartoq Kinami nunanut allanut tunngasunut ministereqarfiup naalakkersuisup nunatsinneersup Taiwanimut tikeraartussanngornera isumakuluutigalugu erseqqissaatigisimavaa.
- Nunat aallartitaasa Taiwanimut tikeraarneri politikkikkullu sumi inissisimaneri Kinamit nakkutigineqartartoq oqaatigineqarsinnaavoq, ilisimatusartoq oqarpoq.
Vittus Qujaukitsoq tikeraarsimagaluarpat, tamanna Camilla T. N. Sørensen naapertorlugu, Taiwanip nunatut namminersortutut Nunatsinnit akuerineqarneratut Kinami naalakkersuisunit isigineqarsimassagaluarpoq.
Inuussutissarsiornermut, aatsitassanut suliffeqarnermullu naalakkersuisoqarfimmi pisortaq KNR-imut mailikkut allappoq Taiwanimiinnermi politikkikkut pisortatigoortumik ataatsimeeqateqarnissaq pilersaarutaasimanngitsoq.
Camilla T. N. Sørensenili naapertorlugu tamanna apeqqutaatinneqarsimassanngikkaluarpoq.
- Kalaallit Nunaata nunanut allanut naalakkersuisuatut Kinamut tikeraaruni, taava aamma Taiwanimut ingerlaqqikkuni taamatut isigineqassaaq, aamma politikkikkut ataatsimiittoqannginnissaa oqaatigineqaraluarpalluunniit, Camilla T. N. Sørensen taama oqarpoq.
Taamaammat Vittus Qujaukitsup Taiwanimut tikeraarnissaa taamaatiinnarneqarpoq.
AAMMA ATUARUK Nunatsinneersut tuniniagassanik Kinami pilerisaarinerat