Taasinerit periarfeerunneqarsimasut pillugit aalajangiisoqangajalerpoq
Kukkuneq Kommuneqarfik Sermersuumit ataasinngormat oqaluttuarineqarpoq, katillugit taasinerit 41-t, kommunimut qinersinermit 36-it, ilagiit sinniisaannut tallimat - qinersinerup inernera allanngortinnavianngikkaat.
Namminersorlutik Oqartussalli qinersinermut ataatsimiititaliaata taakku nammineq misissorusuppai.
Ataatsimiititaliaq taanna ippassaq ataatsimiinnermini aalajangerpoq, kommune qinnuiginiarlugu taasinerit nassiuteqqullugit, suliarlu pillugu nassuiaasoqaqqullugu.
Tamatuma kingorna qinersinermut ataatsimiititaliap naliliiffiginiarpaa allakkatigut taasinerit qinersivinni ilaasortanngortut katitigaanerannut, imaluunniit sinniisussanngortut tulleriiaarnerannut, allanngortitsisinnaanersut.
Neriuutigaarput pisortatigoortumik akissut piaartumik pissarsiarissallugu. Qinersinermut ataatsimiititaliaq ullumi maajip ulluisa aallaqqaataani nalunaaqutaq qulinut ataatsimiissaaq.