Taarsiinissaq ministerimit itigartitsissutigineqarpoq

 Sermitsiaq.ag-mi tamanna atuarneqarsinnaavoq.

Nunat issittumiittut, soorlu Kalaallit Nunaat, avatangiisiminnik mingutsitsinnginnissaat siunertaralugu uuliamik qalluinnginnissamut taarsiivigineqarsinnaanersut Folketingimut ilaasortap Per Clausenip qaammat kingulleq Lykke Friisimut apeqqutigaa.

- Naamik, Lykke Friis akivoq.

- Nunat  sumiikkaluartulluunniit uuliamik qalluinatik aningaasanik taarsiiffigineqartarnissaanik isuma uanga tapersersunngilara, aamma ilimaginngilara isumassarsiaq taanna nunarsuarmioqatitsinnit tapersersorneqassasoq, Per Clausenimut akissummini Lykke Friis erseqqissaavoq.

SF-ip siulittaasua Villy Søvndal KNR-TV-p aallakaatittagaani "Aasaanerani"-mi sapaatip-akunnerani kingullermi aallakaatinneqartumi Per Clausenip siunnersuutaa pillugu aperineqarami oqarpoq isumassarsiamut nammineq isumaqataanani.

- Nunat issittuniittut pisuussutitik qanoq atussanerlugit namminneq aalajangissavaat, SF-ip siulittaasua KNR-imut taamani oqarpoq.