Taamungaannaq aningaasaliisoqarpoq
Kollegianik sanaartornerup aqunneqarnera Aningaasaqarnermut ataatsimiititaliap ersernerlunnerarpaa. Inatsisartut ataatsimiititaliaanni pissaaneqarnerpaap kollegialiortoqarnissaanut qinnuteqaat akuerisimavaa, sanaartorneq kinguaqqissappat ilinniartitaanermut kinguneqapilussammat.
Kollegianik sanaartorneq, 2010-miit 2013-imut nunatta karsianit 168 millionit koruuninik aningaasaliiffigineqartussaq kinguaattooqqavoq, Kinguaattooqqaneranullu peqqutaanerpaat ilagaat naalakkersuisoqarfiit akornannni attaveqaqatigiinnerlunneq. Sulianilli aqutsineq aamma ajorluinnartoq, Aningaasaqarnermut ataatsimiititaliap decembarip pingajuani ataatsimiinnermini isornartorsiorpaa.
Kollegianut sanaartornissamut aningaasat illoqarfiit ilaannaannut atorneqassasut aalajangigaavoq, aningaasanulli qinnuteqaatini sanaartornissamut pilersaarusiat ilanngunneqarsimanngillat, Aningaasaqarnermullu ataatsimiititaliap ilanngullugu eqqaavaa qinnuteqaatini aningaasat qanoq amerlatigisut qinnuteqaatigineqassanersut nalaatsornerinnarmik naatsorsorneqarsimasut.
- Tamanna allatut paasineqarsinnaanngilaq, tassa aningaasanut inatsisissami kollegianut sanaartornissamut aningaasat immikkoortinneqarsimasut annertussusaat nalaatsornerinnarmik aalajangerneqarsimasut, pilersaarusiugaanngitsumik ataqatigiissaarneqanngitsumillu. Tamannalu isornartuuvoq, Aningaasaqarnermut ataatsimiititaliap Aningaasaqarnermut Naalakkersuisoq Palle Christiansen taama nalunaarfigaa.
2006-imi Inatsisartut ilinniartitaanermut immikkut iliortoqassasoq aalajangerpaat. Taamaammat ilinniartitaanerup annertusarneqarnera kollegianik pisariaqartitsinermik annertusaataassasoq tamanit nalunnginneqartussaagaluarpoq.
Kollegianut sanaartornissamut aningaasanik qinnuteqaat akuerineqartussaasimanngikkaluartoq, Aningaasaqarnermut ataatsimiititaliaq isumaqarpoq. Kollegianilli nutaanik pisariaqartitsineq ima annertutigaaq ataatsimiititaliaq qinnuteqaammik akuersisariaqarsimalluni, erseqqissaatigaallu kollegianik sanaartorneq kinguaqqinnissaa akueriumanagu.
